ព្រះវិហារ ៖ បើយោងតាមការផ្សព្វផ្សាយរបស់ក្រសួងបរិស្ថាន នៅថ្ងៃទី៤ខែមេសានេះថា បន្តអនុវត្តតាមប្រសាសន៍ដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្រសួងបរិស្ថាន ផ្តល់ថវិកា USD ២០.០០០ ដល់លោក បេន ដេវីស និងសហគមន៍តាបស ខេត្តព្រះវិហារ។
នៅឆ្នាំ២០១៩ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានប្រគល់ជូន លោកបេន ដេវីស នូវរថយន្ត pickup ចំនួន ១ គ្រឿង ម៉ូតូចំនួន២ គ្រឿង និងថវិកា USD ២០.០០០ ពីមូលនិធិបរិស្ថាននិងសង្គមនៃក្រសួងបរិស្ថាន។
ឆ្នាំ២០២០នេះ ក្រសួងបរិស្ថាន បន្តអនុវត្តតាមប្រសាសន៍ ដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានផ្តល់ថវិកាចំនួន USD ២០.០០០ (ម្ភៃពាន់ដុល្លារអាមេរិកគត់) សម្រាប់ឆ្នាំទី ២ ដើម្បីលើកទឹកចិត្តដល់លោក បេន ដេវីស (BEN DEVIS) ចូលរួមជាមួយរាជរដ្ឋាភិបាលក្នុងការការពារ និងអភិរក្សធនធានធម្មជាតិ នៅដែនជម្រកសត្វព្រៃ “ភ្នំត្នោត-ភ្នំពក”។
កាលពីថ្ងៃព្រហស្បតិ៍ ទី២ ខែមេសា ឆ្នាំ២០២០ ឯកឧត្តម ខៀវ បូរិន មានប្រសាសន៍ថា ថវិកា USD២០.០០០ (ម្ភៃពាន់ដុល្លារអាមេរិកគត់) សម្រាប់ឆ្នាំទី ២នេះ លោក BEN DEVIS ស្ថាបនិក BeTreed Adventure សហការជាមួយសហគមន៍តាបស នឹងបន្តអនុវត្តការងារដូចខាងក្រោម៖ ១. បន្តជួសជុលផ្លូវលំ តភ្ជាប់ពីសហគមន៍ មកដែនជម្រកសត្វព្រៃភ្នំត្នោត និងផ្លូវលំជុំវិញដែនជម្រកសត្វព្រៃ ដើម្បីងាយល្បាត ២. រៀបចំកំណត់ទីតាំង ក្នុងដែនជម្រកសត្វព្រៃដើម្បីដាក់ជា ចំការពូជឈើនាងនួន និងដាំចំការនាងនួនថ្មី លើផ្ទៃដីចំនួន ៤ហិកតា ដែលទើបបានដោះដូរ ជាមួយប្រជាជន ៣. អនុវត្តការដោះដូរដី ជាមួយប្រជាជន ដែលមានចំការនៅក្នុងតំបន់ស្នូល នៃដែនជម្រកសត្វព្រៃភ្នំត្នោត-ភ្នំពក ៤. ធ្វើការល្បាតជាមួយសហគមន៍៕ដោយ៖កូឡាប