ភ្នំពេញ៖ អគ្គនាយកដ្ឋានអន្តោប្រវេសន៍ បានថ្លែងប្រាប់មន្ត្រីប៉ុស្តិ៍ទាំងអស់ថា បើទោះបីជាមានការបិទច្រកទ្វារព្រំដែន គ្មានអ្នកដំណើរចេញ-ចូល ក៏នៅតែមានស្មារតីទទួលខុសត្រូវខ្ពស់ អនុវត្តភារកិច្ច ដើម្បីប្រយុទ្ធប្រឆាំងនឹងជំងឺឆ្លង Covid-19 ។
ឯកឧត្ដម នាយឧត្ដមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ និងប្រតិភូអមដំណើរ បានអញ្ជើញមកសំណេះសំណាល សួរសុខទុក្ខ ដល់មន្ត្រីនគរបាលប៉ុស្តិ៍ នាល្ងាចថ្ងៃសុក្រទី៣ ខែមេសា ឆ្នាំ ២០២០ នៅប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ។
ជាកិច្ចចាប់ផ្ដើម ឯកឧត្ដម នាយឧត្ដមសេនីយ៍ បានសំដែងនៅការកោតសរសើរ និងថ្លែងអំណរគុណ ចំពោះមន្ត្រីប៉ុស្តិ៍ទាំងអស់ បើទោះបីជាមានការបិទច្រកទ្វារព្រំដែន គ្មានអ្នកដំណើរចេញ-ចូល ក៏អស់លោកនៅតែមានស្មារតីទទួលខុសត្រូវខ្ពស់ អនុវត្តភារកិច្ច បម្រើជាតិមាតុភូមិ និងប្រជាពលរដ្ឋដោយស្មោះត្រង់បំផុត។
ឆ្លៀតក្នុងឱកាសដ៏វិសេសវិសាលនេះដែរ ឯកឧត្ដម នាយឧត្ដមសេនីយ៍ បានមានអនុសាសន៍ ផ្ដាំផ្ញើដល់មន្ត្រីទាំងអស់ ធ្វើយ៉ាងណាបង្កើនការយកចិត្តទុកដាក់ ឲ្យអស់លទ្ធភាពតាមតែអាចធ្វើទៅបាន ដើម្បីប្រយុទ្ធប្រឆាំងនឹងជំងឺឆ្លង Covid-19 និងបានផ្ដល់អនុសាសន៍ ដ៏ខ្ពងខ្ពស់ស្ដីពីវិធានការទប់ស្កាត់ ការរីករាយដាល នៃជំងឺឆ្លង Covid-19។
មុននឹងបញ្ចប់ ឯកឧត្ដម នាយឧត្ដមសេនីយ៍ បានជូនពរដល់មន្ត្រីទាំងអស់ សូមជួបតែសេចក្ដីសុខ និងជៀសផុតពីការឆ្លង នៃជំងឺគ្រប់បែបយ៉ាង និងបានប្រកាសប្រគល់ នូវអំណោយដ៏ថ្លៃថ្លាមួយចំនួន មានថវិកា និងគ្រឿងឧបភោគ បរិភោគ ជូនដល់មន្ត្រីប៉ុស្តិ៍ រួមមាន ថវិកាចំនួន ៥.០០០.០០០៛ (ប្រាំលានរៀល), អង្ករ ២ តោន, មី ២០កេសធំ, ត្រីខ ១៣កេសធំ៕ដោយ៖បញ្ញាស័ក្តិ