ម៉ាឡេស៊ី៖ យោងតាម Sinar ស្រី្តជើងខ្លាំងម្នាក់ត្រូវបានចោទប្រកាន់ពីបទរារាំង និងមានអាកប្បកិរិយាមិនសមរម្យ ទៅលើមន្ត្រីសមត្ថកិច្ច ។ បទល្មើសត្រូវផ្តន្ទាទោសដោយពិន័យមិនលើសពី RM10,000 ក្រោមមាត្រា ១៤ នៃច្បាប់ស្តីពីបទល្មើសឆ្នាំ ១៩៥៥ របស់ម៉ាឡេស៊ី ។
យោងទៅតាមការចោទប្រកាន់នេះ ស្ត្រីខាងលើដែលមានឈ្មោះថា Poh King ត្រូវបានចោទប្រកាន់ពីបទប្រព្រឹត្តិ មិនសមហេតុផលប្រឆាំងនឹងប៉ូលិស ដោយស្រែកដាក់ឲ្យប៉ូលិសថាជា “មនុស្សល្ងីល្ងើ” ។ ចំពោះការចោទប្រកាន់ទី២ ស្ត្រីរូបនេះត្រូវបានគេរកឃើញថាបានរារាំងមន្ត្រីសមត្ថកិច្ច មិនឱ្យបំពេញមុខងាររបស់ពួកគេដោយចេតនា។ បទល្មើសទាំងពីរនេះរបស់ស្ត្រីរូបនេះ គឺបានប្រព្រឹត្តនៅឯផ្លូវ Jalan Persiaran Surian ឆ្ពោះទៅកាន់ Damansara Dam កាលពីវេលាម៉ោង ៩ និង ៤០ នាទីព្រឹកថ្ងៃទី ៣១ ខែមីនា ឆ្នាំ២០២០។
ប្រសិនបើត្រូវបានរកឃើញថា មានពិរុទ្ធភាព នាង Poh King នឹងត្រូវចោទប្រកាន់ក្រោមមាត្រា ១៤ នៃច្បាប់ឧក្រិដ្ឋកម្មកម្រិតស្រាលឆ្នាំ ១៩៥៥ ជាមួយនឹងការពិន័យជាប្រាក់អតិបរមា RM100 (ស្មើ ២០ ដុល្លារ) ខណៈការចោទប្រកាន់លើកទី ២ ត្រូវបានផ្តន្ទាទោសតាមមាត្រា ១៨៦ នៃក្រមព្រហ្មទណ្ឌដែលដាក់ពន្ធនាគាររយៈពេល ២ ឆ្នាំ ឬពិន័យជាប្រាក់រហូតដល់ RM10,000 (ជាង២ពាន់ដុល្លារ) ឬទាំងពីរ ទៅតាមការផ្តន្ទាទោស។
ទោះយ៉ាងណា តុលាការបានអនុញ្ញាតឲ្យ Poh King មានសិទ្ធិបង់ប្រាក់ធានាក្រៅឃុំចំនួន RM1,000 (ស្មើ ២៣០ ដុល្លារ) សម្រាប់ការចោទប្រកាន់លើកទី ១ និង RM 3,000 (ជិត ៧០០ ដុល្លារ) សម្រាប់ការចោទប្រកាន់លើកទី ២ ដោយរង់ចាំការជំនុំជម្រះនៅថ្ងៃទី ២០ ខែឧសភា។
ជាការពិតណាស់ វាជាវេលាដ៏តានតឹងមួយសម្រាប់យើងទាំងអស់គ្នា នាពេលនេះ ប៉ុន្តែសង្ឃឹមថា មុនពេលនឹងអ្នកសម្រេចចិត្តហាមាត់និយាយ ទៅកាន់មន្ត្រីប៉ូលិស គួរណាស់អ្នកគិតពីផលវិបាក ដែលអ្នកអាចនឹងប្រឈមមុខ ពីលទ្ធផលនៃទង្វើរបស់ខ្លួនផង ៕
ប្រែសម្រួល៖ លឹម ហុង (ប្រភព៖ worldofbuzz)