រូបនៃយន្តហោះដ៏ប្រណីតអស្ចារ្យមួយគ្រឿង ដែលមានមូលដ្ឋាននៅទីក្រុងឌូបៃ បានកំពុងធ្វើឲ្យមនុស្សម្នាជុំវិញពិភពលោក ចាប់អារម្មណ៍ និងភ្ញាក់ផ្អើលស្ទើរមិនគួរឲ្យជឿសោះឡើយ ។ តែទោះយ៉ាងណា មូលេហេតុស្ថិតនៅពីក្រោយនៃយន្តហោះ Boeing777 ស្រោបពេជ្រនេះ ត្រូវបានលាតត្រដាង ។
ជាការពិតណាស់ អ្វីៗអស្ចារ្យទាំងអស់នៃយន្តហោះនេះ គឺពុំមានជាការពិតនោះទេ ព្រោះថា វាគ្រាន់តែជាស្នាដៃមួយ របស់អតីតពេទ្យធ្មេញម្នាក់ឈ្មោះ Sara Shakeel ដែលនាងបានថតយកទិដ្ឋភាពយន្តហោះនៅ Islamabad មុនពេលហោះហើរទៅកាន់ទីក្រុង Milan (អ៊ីតាលី) ទៅកែច្នៃក្នុងកម្មវិធី Photoshop ដើម្បីបង្ហោះចូលក្នុងគណនី Instagram របស់នាង ដើម្បីពញ្ញាក់អារម្មណ៍អ្នករាល់គ្នាប៉ុណ្ណោះ។
យ៉ាងណាមិញ ក្រោយរូបភាពនេះត្រូវបានបង្ហោះ មានមនុស្សយ៉ាងច្រើនបានចូលខំមិនចោទសួរឡើងថា តើវាជាការពិត ឬ ក្លែងក្លាយ? ។ នៅពេលឃើញចំនួនអ្នកចូលមើលភ្លូកទឹកភ្លូកដី នាង Sara ក៏បាននិយាយបែបរំភើបថា ពេលនេះ យន្តហោះស្រោបពេជ្ររបស់ខ្ញុំកំពុងល្បីហើយ ព្រោះតែម្នាក់ៗពិតជាចង់ដឹងខ្លាំងមែនទែន ថាវាជារឿងពិតដែរឬអត់នោះ ?
នាងបានឲ្យដឹងថា “ដើម្បីបញ្ជាក់ថាតើវាពិត ឬ មិនពិត ដូច្នេះ មុនហោះហើរ ខ្ញុំនឹងថតរូបភាពផ្សេង ដើម្បីទុកឲ្យអ្នកទាំងអស់គ្នាបានឃើញថាវាពិត” ។ នាងក៏បានបន្ថែមថា៖ “តាមពិតទៅ ខ្ញុំច្នៃប្រឌិតយន្តហោះស្រោបពេជ្រនេះឡើង គឺគ្រាន់តែជាក្តីស្រឡាញ់ និងធ្វើឲ្យដំណើរកម្សាន្តរបស់ខ្ញុំកាន់តែរីករាយ” ៕
ប្រែសម្រួល៖ លឹម ហុង (ប្រភព៖ albawaba.com)
