ភ្នំពេញ៖ អគ្គនាយកដ្ឋានអន្តោប្រវេសន៍ បានឲ្យដឹងថា នៅព្រឹកថ្ងៃទី៥ ខែមេសា ឆ្នាំ២០២០ នៅច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ មានប្រជាពលរដ្ឋ និងអាជីវករខ្មែរ មកប្រមូលផ្ដុំគ្នានៅលើស្ពានមិត្តភាព កម្ពុជា-ថៃ ដើម្បីសួរនាំអាជ្ញាធរថៃ ច្រកទ្វារព្រំដែនអន្តរជាតិ ខ្លង លឹក អំពីកាលបរិច្ឆេទ នៃថ្ងៃបើកច្រកពេលណាពិតប្រាកដ។
បន្ទាប់មកឯកឧត្តម ង៉ោ ម៉េងជ្រួន អភិបាលរងខេត្តបន្ទាយមានជ័យ, លោកឧត្តមសេនីយ៍ត្រី ឡុង មិថុនា អនុប្រធាននាយកដ្ឋានច្រកទ្វារទី១ និងលោកឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាល ច្រកទ្វារព្រំដែនអន្តរជាតិប៉ោយប៉ែត បានសម្របសម្រួលប្រជាពលរដ្ឋ អាជីវករ ឲ្យបានយល់អំពីភាគីខាងថៃ តម្រូវឲ្យពន្យារពេលទៀត ដោយប្រទេសថៃដាក់ក្នុងភាពអាសន្ន ដូច្នេះបងប្អូនប្រជាពលរដ្ឋ គួរតែយល់អំពីជំងឺ COVID -19 ជាជំងឺឆ្លងដ៏កាចសាហាវ ហើយពួកគាត់ក៏បានរំសាយ ទៅផ្ទះរៀងៗខ្លួនវិញ។
ក្នុងនោះដែរ លោកឧត្តមសេនីយ៍ត្រី ឡុង មិថុនា និងលោកឧត្តមសេនីយ៍យ្រី អ៊ី ចំរើន បានចុះពិនិត្យសកម្មភាពបំពេញការងារ របស់មន្ត្រីនៅតាមគោលដៅគ្រប់ផ្នែករបស់ប៉ុស្តិ៍ និងពិនិត្យការជួសជុល កែលម្អបន្ទប់ សម្រាប់ភ្ញៀវរង់ចាំ នៅផ្នែកបែបបទចេញ-ចូល រង្វង់មូល បន្ទាប់មកលោក ក៏បានផ្តាំផ្ញើឲ្យមន្ត្រីក្រោមឱវាទ ចេះសម្អាតដៃ ការពារជំងឺឆ្លង និងគោរពវិន័យរបស់អង្គភាព ជាមន្ត្រីជួរមុខដ៏ល្អ និងជាមន្ត្រីគំរូរបស់អគ្គនាយកដ្ឋានអន្តោប្រវេសន៍ផងដែរ៕ ដោយ៖កូឡាប
