មណ្ឌលគិរី៖ សូមផ្តាំទៅថ្នាក់ដឹកនាំក្រុមហ៊ុនវិរៈប៊ុនថាំ ថាជីវិតមនុស្សច្រើនណាស់ដែលផ្ញើលើតៃកុងរថយន្ត អញ្ចឹងទេសូមជ្រើសរើសតៃកុង ដែលមានសមត្ថភាពបើកបរ និងទំនួលខុសត្រូវខ្ពស់ ចៀសវាងដូចករណីខាងក្រោម។
នៅម៉ោង៤ទៀបភ្លឺថ្ងៃនេះ មនុស្ស១២នាក់ របួសធ្ងន់ស្រាល ដោយរថយន្តក្រុងគ្រែ២ជាន់ រមៀលខ្លួនចេញពីផ្លូវជាតិ ក្រឡាប់ប្រាស់ដេក ក្នុងអូរប្របផ្លូវ ពេលកំពុងបើក ពីភ្នំពេញ ឆ្ពោះទៅខេត្តរតនគិរី។
សេចក្តីរាយការណ៍ពីសមត្ថកិច្ចថា នៅវេលាម៉ោង៤និង១៥នាទីទៀបភ្លឺ ថ្ងៃទី៥ ខែមេសា ឆ្នាំ២០២០នេះ មានរថយន្ត
ដឹកអ្នកដំណើរពីរជាន់របស់ក្រុមហ៊ុនវិរៈប៊ុនថាំ ចេញដំណើរពីភ្នំពេញទៅខេត្តរតនគិរី លុះមកដល់ចំណតក្រុមហ៊ុន នៅខេត្តមណ្ឌលគិរី បានឈប់ដាក់អ្នកដំណើរ ហើយបន្តហួសទៅខេត្តរតនគិរី ។
សមត្ថកិច្ច បានបន្តថា ពេលចេញដំណើរពីចំណតបានប្រហែល ៣គីឡូម៉ែត្រ ចំណុចស្ពានទី២ សង្កាត់រមនា ក្រុងសែនមនោរម្យ រថយន្តក៏បានជ្រុលចង្កូតធ្លាក់ផ្លូវ បណ្តាលឲ្យមានរបួសធ្ងន់ស្រាល ចំនួន១២នាក់ ក្នុងនោះមានក្មេង២នាក់ និង របួសធ្ងន់៣នាក់ ។
សមត្ថកិច្ច បានបញ្ជាក់ថា ក្រោយពិនិត្យទីតាំង និងសាកសួរព័ត៌មានលម្អិត មូលហេតុ គឺបណ្តាលមកពី អ្នកបើកបរ បើកក្នុងល្បឿនលឿន ជាមួយនឹងស្ថានភាពផ្លូវចុះចំណោតកោង ហើយមានស្ពានភាពនៅខាងមុខទៀត ក៏ជ្រុលចង្លូតធ្លាក់ផ្លូវតែម្តង។
ក្រោយកើតហេតុ អ្នកបើកបរបានរត់គេចខ្លួន ដោយបន្សល់ទុកអ្នករបួសរដូករណែល ហើយសមត្ថកិច្ច បានយកអ្នករបួសដាក់រថយន្តសាម៉ុយ យកទៅសង្គ្រោះនៅមន្ទីរពេទ្យ៕ ដោយ៖បញ្ញាស័ក្តិ