ភ្នំពេញ កម្លាំងនគរបាល អន្តរាគមន៍ ខណ្ឌសែនសុខ ឃាត់ខ្លួនជនសង្ស័យបានម្នាក់ រីឯបក្ខពួកគេម្នាក់ទៀតរត់គេចខ្លួនបាត់
ហេតុការណ៍បង្កឲ្យមានការភ្ញាក់ផ្អើលនេះបានកើតឡើងកាលពីវេលាម៉ោង១២និង៤០នាទីយប់រំលងអធ្រាត្រឈានចូលថ្ងៃអាទិត្យ ទី៥ខែមេសាឆ្នាំ២០២០ នៅតាមបណ្ដោយផ្លូវ១០០៣ ជិតសាលាអាយយូ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
សមត្ថកិច្ចបានឲ្យដឹងថា មុនពេលឃាត់ខ្លួនជនសង្ស័យខាងលើ គឺកម្លាំងនគរបាល អន្តរាគមន៍ខណ្ឌសែនសុខ បានជិះម៉ូតូល្បាតក្នុងមូលដ្ឋានដើម្បីទប់ស្កាត់បទល្មើសផ្សេងៗ ខណៈកំពុងជិះល្បាតស្រាប់តែប្រទះឃើញជនសង្ស័យ២នាក់ជិះម៉ូតូធំមួយគ្រឿង ពណ៌ខ្មៅពាក់ផ្លាកលេខភ្នំពេញ1BB-4863ភ្លាមនោះ កម្លាំងនគរបាល បានហៅឲ្យឈប់តែជនសង្ស័យទាំង២នាក់ មិនបានឈប់នោះទេបែរជាព្យាយាមជិះម៉ូតូរត់គេច ឃើញដូច្នេះសមត្ថកិច្ចក៏បានជិះម៉ូតូដេញ តាមពីក្រោយរហូតដល់ចំណុចកើតហេតុខាងលើ ក្រុមជនសង្ស័យបានផ្ដួលម៉ូតូ រត់គេចខ្លួនតែត្រូវសមត្ថកិច្ចឃាត់ខ្លួនបានម្នាក់ ឆែកឆេរកឃើញថ្នាំញៀន ចំនួន២កញ្ចប់ និងអាវុធខ្លីមួយដើមរួចបាននាំយកទៅធ្វើការសួរនាំ ឯបក្ខពួកជនសង្ស័យម្នាក់ទៀត បានរត់គេចខ្លួនបាត់ស្រមោល។
បច្ចុប្បន្ន ជនសង្ស័យរួមនិងវត្ថុតាងត្រូវបាននគរបាលប៉ុស្តិ៍ភ្នំពេញថ្មី ធ្វើការសាកសួរនិងកសាងសំណុំរឿងបញ្ជូនទៅ អធិការដ្ឋានខណ្ឌសែនសុខ ដើម្បីចាត់ការបន្តតាមនីតិវិធី។ ចំណែកបក្ខពួកជនសង្ស័យម្នាក់ទៀត ដែលរត់គេចខ្លួន សមត្ថកិច្ចកំពុងធ្វើការស្រាវជ្រាវ តាមចាប់យកមកផ្ដន្ទាទោសតាមច្បាប់៕ដោយ៖សាម៉េត