ភ្នំពេញ៖ លោកជំទាវ ឱ វណ្ណឌីន អ្នកនាំពាក្យ និងជារដ្ឋលេខាធិការក្រសួងសុខាភិបាល បានមានប្រសាសន៍ថា ទោះបីជាយ៉ាងណា នេះជាជោគជ័យមួយជំហាន របស់ក្រសួងសុខាភិបាល និងស្ថាប័នពាក់ព័ន្ធ ដែលយើងបានព្យាបាលបានជាសអះស្បើយបន្តបន្ទាប់ ហើយករណីឆ្លងថ្មី។
លោកជំទាវ បានបន្តថា យើងមិនទាន់អាចវាយតម្លៃបាននៅឡើយទេ ត្រូវប្រយ័ត្នខ្ពស់ណាស់ក្នុងដំណាក់កាលនេះ ព្រោះទើបតែពីរថ្ងៃ មិនមានករណីថ្មី តាមបច្ចេកទេសគ្រាន់តែជាការបង្ហាញ នូវប្រសិទ្ធភាពអន្តរាគមន៍របស់យើង ជាបណ្តើរៗ តែប៉ុណ្ណោះ តែស្ថានភាពនៅផុសស្រួយណាស់។
លោកជំទាវ បានលើកឡើងថា ទោះជាយ៉ាងណា យើងត្រូវធ្វើឲ្យកាន់តែខ្លាំងក្លាបន្ថែមទៀត ជាពិសេសការចូលរួមពីបុគ្គលម្នាក់ៗ នៅតែជាកូនសោន្លឹះ នៃការវាយបកទៅលើការចម្លងវីរុសកូវីដ១៩ សំដៅទៅរកភាពជោគជ័យពិតប្រាកដបាន។ បើយើងភ្លេចខ្លួន សត្រូវនេះនឹងវាយលុកមកយើងវិញ ក្នុងរយ:ពេលដ៏ខ្លីបំផុត។ ពេលខ្លះ មានការស្ងប់ស្ងាត់បន្តិច តែក៏អាចមានការរាតត្បាតជាបន្តទៀតដែរ ដែលគេហៅថា second wave។ ដូច្នេះ ត្រូវបោះជំហានសកម្មទប់ស្កាត់ជាបន្តទៀត ទើបអាចសង្កត់សត្រូវវីរុសកូវីដ១៩នេះបាន៕ដោយ៖បញ្ញាស័ក្តិ