ភ្នំពេញ៖ ដំណឹងរីករាយសម្រាប់ប្រជាពលរដ្ឋកម្ពុជា បន្ទាប់ពីក្រសួងសុខាភិបាល បានចេញប្រកាសព័ត៌មានថា រហូតម៉ោង ៨ព្រឹក ថ្ងៃទី ៦ មេសា ២០២០ យើងពុំរកឃើញអ្នកជំងឺ COVID-19 ថ្មីទេ សរុបទាំងអស់ប្រទេសយើងមានចំនួន ១១៤ ករណី និង យើងបានព្យាបាលជាសះស្បើយថែម៣ករណី សរុប៥៣ករណី ស្លាប់គ្មាន ។
ក្រសួងជំនាញដដែល បានលើកឡើងថា យើងពុំទាន់រកឃើញភស្តុតាងបញ្ជាក់ថា មានការឆ្លងក្នុងសហគមន៍នៅឡើយទេ តែលទ្ធភាពនឹងអាចកើតមានឡើង ព្រោះប្រទេសដទៃ ក្នុងពិភពលោកនៅបន្តរាតត្បាត ។
ចំណែកអ្នកកំពុងសម្រាកព្យាបាលជំងឺកូវីដ១៨ បានធ្លាក់ចុះមកត្រឹមចំនួន៦១នាក់ នៃអ្នកឆ្លងសរុប១១៤នាក់។ បើគិតត្រឹមព្រឹកថ្ងៃទី៦ ខែមេសា ឆ្នាំ២០២០នេះ។ ករណីជាសះស្បើយ៣នាក់ថ្មីទៀតនេះ មានបុរសជនជាតិម៉ាឡេស៊ី អាយុ៣៩ឆ្នាំ បុរសជនជាតិម៉ាឡេស៊ី អាយុ២៦ឆ្នាំ និងបុរសជនជាតិម៉ាឡេស៊ី អាយុ៤០ឆ្នាំ ដែលត្រឡប់មកពីធ្វើការសាសនា នៅស្រុកកងមាស ខេត្តកំពង់ចាម។ ពេលនេះ ពួកគេត្រូវបានអនុញ្ញាតឱ្យចាកចេញពីមន្ទីរពេទ្យខេត្តកំពង់ចាម ត្រឡប់ទៅផ្ទះវិញហើយ៕ ដោយ៖កូឡាប
