ភ្នំពេញ ៖ ខណៈដែលមេរោគកូវីដ-១៩ នៅតែបន្តញាំញីពិភពលោកនោះ សម្រាប់ប្រទេសកម្ពុជា លើវិស័យកីឡា រាល់ការចេញទៅហ្វឹកហាត់នៅក្រៅប្រទេសទាំងអស់ ត្រូវបានលុបចោល ដោយគ្មានកំណត់ពេលវេលាឡើយ។
អគ្គលេខាធិការគណៈកម្មាធិការជារិអូឡាំពិកកម្ពុជា និងជាអគ្គលេខាធិការគណៈកម្មាធិការជាតិរៀបចំស៊ីហ្គេមឆ្នាំ២០២៣ (Camsoc)
ឯកឧត្តមវ៉ាត់ ចំរើន មានប្រសាសន៍ថា ប្រសិនបើយើងនៅតែរឹងទទឹង បញ្ជូនទៅហាត់នៅក្រៅប្រទេសនោះ ក៏គេបិទទ្វារមិនឲ្យយើងចូលដែរព្រោះពេលនេះ មេរោគផ្លូវដង្ហើមប្រភេទថ្មីនេះ នៅមិនទាន់បញ្ឈប់ការរាតត្បាតពិភពលោកនៅឡើយទេ ។
សម្រាប់ប្រភេទកីឡាកាយសម្ព័ន្ធលោកណយ ផាណា មានគម្រោងបញ្ជូនកីឡាករវ័យក្មេងទៅហាត់នៅប្រទេសចិន និង ប្រទេស
ជប៉ុនតែពេលនេះពួកគេត្រូវហ្វឹកហាត់នៅតាមផ្ទះរៀងៗខ្លួន ទៅតាមកម្មវិធី ដែលលោកបញ្ជូនទៅឲ្យបើយើងមិនឲ្យពួកគេហ្វឹកហាត់ទេនោះពួកគេនឹងបាត់បង់នូវគុណផលរបស់ខ្លួនជាមិនខាន ។
ឯកឧត្តម វ៉ាត់ ចំរើន បញ្ជាក់បន្តថា យើងលុបចោលរាល់ការចេញទៅហាត់នៅក្រៅប្រទេសមែន តែយើងបានប្រាប់ទៅសហព័ន្ធជាតិ
នីមួយៗដោយឲ្យគ្រូបង្វឹក គ្រូជំនួយផ្ដល់កម្មវិធីហ្វឹកហាត់ ដល់ពួកគេដោយគ្រូបន្តតាមដាន នូវការហ្វឹកហាត់ទាំងនោះ ឲ្យបានហ្មត់ចត់ ។ពួកគេបើចង់រក្សាបាននូវគុណផល កីឡារបស់ខ្លួន គេត្រូវតែហ្វឹកហាត់ដោយស្មោះត្រង់ ។
ឯកឧត្តមនាយឧត្តមសេនីយ៍គៀត ច័ន្ទថារិទ្ធ ប្រធានសហព័ន្ធកីឡាវាយកូនឃ្លីលើតុកម្ពុជា ដែលមានគម្រោងបញ្ជូនកីឡាករ កីឡាការិនី
របស់ខ្លួនទៅហាត់នៅប្រទេសចិន ជប៉ុន និងកូរ៉េនោះ ក៏សម្ដែងនូវការខកចិត្តយ៉ាងខ្លាំដែរ ។ លោកស៊ុន សុទ្ធារិទ្ធ ដែលជាអគ្គលេខាធិការនៃសហព័ន្ធនេះ មានប្រសាសន៍ថា យើងនឹងឆ្លៀតប្រើពេលវេលា ហ្វឹកហាត់ក្រៅការជួបជុំគ្នាច្រើន ដើម្បីកុំឲ្យគុណផលកីឡាស្រុតចុះខ្លាំងពេក ។
សហព័ន្ធកីឡាតេក្វាន់ដូ I.T F (International Taekwondo Federation)កម្ពុជា ដែលមានគម្រោងបញ្ជូនកីឡាករ កីឡាការិនីរបស់ខ្លួនទៅចូលរួមប្រកួតក្នុងព្រឹត្តិការណ៍នានា នៅក្រៅប្រទេសនោះ ក៏មានការខកចិត្តដែរ ដោយសារប្រទេសជាម្ចាស់ផ្ទះបានលុបចោល ឬ លើកពេលនៃការប្រកួត ។
លោកអគ្គលេខាធិការគណៈកម្មាធិការជាតិអូឡាំពិកកម្ពុជា ទទួលស្គាល់ថា គ្មានអ្វីដែលជាជម្រើសល្អជាង ការហ្វឹកហាត់ដោយខ្លួន
ឯងឲ្យបានខ្លាំងនោះទេ ។ ដំណាក់កាលនេះ មានតែការហ្វឹកហាត់ដោយស្មោះត្រង់ តាមកម្មវិធីដែលគ្រូបង្វឹក គ្រូជំនួយដាក់ឲ្យតែប៉ុណ្ណោះ ៕ដោយ៖បញ្ញាស័ក្តិ
