ភ្នំពេញ ៖ កម្លាំងចម្រុះ បានចុះបង្ក្រាបទីតាំងបើកល្បែងស៊ីសងខុសច្បាប់ ជល់មាន់ នៅក្នុងដីឡូត៍គ្មានលេខ ភូមិចំពុះក្អែក១ សង្កាត់ព្រែកថ្មី ថ្ងៃទី០៥ ខែមេសា ឆ្នាំ២០២០ វេលាម៉ោង១០និង៣០នាទី ដកហូតរថយន្ត៥គ្រឿង និងម៉ូតូ១៨គ្រឿង ។
ការចុះបង្ក្រាបនេះ ដោយមានការអនុញ្ញាតពីលោក សំម ឬទ្ធីវាសនា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងដោយមានបញ្ជាពីលោក ចេង មុនីរ៉ា អភិបាលខណ្ឌ និងជាប្រធានគណៈបញ្ជាការឯកភាពខណ្ឌច្បារអំពៅ កម្លាំងចម្រុះដឹកនាំដោយ លោក រស់ សុភ័ក្ត្រ អភិបាលរងខណ្ឌ លោក វរសេនីយ៍ទោ ម៉ៅ សឿត អធិការនគរបាលខណ្ឌ លោក លីវ វណ្ណថេង ចៅសង្កាត់ព្រែកថ្មី និងលោកវរសេនីយ៍ត្រី ម៉ៅ ស៊ីវន នាយប៉ុស្តិ៍ បាន ចុះបង្ក្រាបជាក់ស្តែងទីតាំង បើកល្បែងស៊ីសងខុសច្បាប់ ជល់មាន់នៅក្នុងដីឡូត៍គ្មានលេខ ភូមិចំពុះក្អែក១ សង្កាត់ព្រែកថ្មី ខណ្ឌច្បារអំពៅ ។
ដកហូតវត្ថុតាងរួមមាន ៖ រថយន្ត ៥គ្រឿង ម៉ូតូ ១៨គ្រឿង មាន់ជល់ ៣ក្បាល កៅអីជ័រ ១០០ និងស៊ុម សម្រាប់ក្រុងមាន់ ៥៦។ ចំណែកអ្នកមកលេងជល់មាន់ បានរត់គេចខ្លួនបាត់អស់ នៅពេលសមត្ថកិច្ចចុះទៅដល់។
សូមបញ្ជាក់ថា ទីតាំងខាងលើនេះ ទើបរៀបចំបើកដំណើរការឲ្យគេមកលេងជល់មាន់នៅព្រឹកថ្ងៃទី៥មេសានេះទេ ពោលគឺបើកភ្លាមកម្លាំងសមត្ថកិច្ចអាជ្ញាធរខណ្ឌច្បារអំពៅ ចុះបង្ក្រាបភ្លាម ក្នុងន័យលុបបំបាត់រាល់បនល្បែងស៊ីសងខុសច្បាប់ផងដែរ ហើយរាល់សកម្មភាពរបស់កម្លាំងសមត្ថកិច្ច អាជ្ញាធរខណ្ឌច្បារអំពៅ ចុះបង្ក្រាបបនល្បែងស៊ីសងជល់មាន់នេះ ធ្វើឲ្យមហាជនទូទៅ មានការគាំទ្រជាខ្លាំង ខណៈពេលកម្លាំងសមត្ថកិច្ច អាជ្ញាធរខណ្ឌច្បារអំពៅ ប្រើកណ្ដាប់ដៃដែក ចុះបង្ក្រាបបនល្បែងស៊ីសងខុសច្បាប់។
បច្ចុប្បន្ន វត្ថុតាងខាងលើ បានយកមករក្សាទុកនៅអធិការដ្ឋាននគរបាលខណ្ឌ ដើម្បីស្រាវជ្រាវរកម្ចាស់៕ដោយ៖បញ្ញាស័ក្តិ