សហរដ្ឋអាមេរិចប្រកាសផ្តល់រង្វាន់ជាទឹកប្រាក់ចំនួន ១៥លានដុល្លារ សម្រាប់ការផ្តល់ព័ត៌មានឈានដល់ការចាប់ខ្លួនប្រធានាធិបតីវេណេហ្ស៊ុយអេឡា Nicolas Maduro ដោយចោទប្រកាន់មេដឹកនាំរូបនោះពីបទជួញដូរគ្រឿងញៀន។ នេះបើតាមការបញ្ជាក់របស់រដ្ឋមន្ត្រីការបរទេសអាមេរិច Mike Pompeo កាលពីចុងខែមីនាកន្លងទៅនេះ។
លោក Mike Pompeo បានប្រកាសពីប្រាក់រង្វាន់ ខណៈដែលក្រសួងយុត្តិធម៌អាមេរិចបានធ្វើការចោទប្រកាន់ មេដឹកនាំវេណេហ្ស៊ុយអេឡា ដោយបានចាត់ទុកលោកថាជាឧក្រិដ្ឋជន ជាជាងប្រមុខរដ្ឋ។
“ប្រជាជនវេណេហ្ស៊ុយអេឡាសមនឹងទទួលបានរដ្ឋាភិបាល តំណងប្រកបដោយតម្លាភាព និងការទទួលខុសត្រូវ ដែលបម្រើសេចក្តីត្រូវការរបស់ប្រជាពលរដ្ឋ និងមិនក្បត់ទំនុកចិត្តរបស់ប្រជាពលរដ្ឋតាមរយៈការផ្តល់ឱកាស ឬផ្តល់ការងារដល់មន្ត្រីដែលបានចូលរួម ក្នុងការជួយដូរគ្រឿងញៀនខុសច្បាប់”។ នេះជាការបញ្ជាក់របស់លោក Mike Pompeo នៅក្នុងសេចក្តីប្រកាស។
មន្ត្រីអាមេរិចនិយាយថា លោក Nicolas Maduro គឺជាមេដឹកនាំនៃក្រុមជួញដូរគ្រឿងញៀនកាកូអ៊ីនឈ្មោះ ‘ក្រុមព្រះអាទិត្យ (Cartel of the Suns)’ ដែលពាក់ព័ន្ធនឹងអ្នកនយោបាយជាន់ខ្ពស់ និងប្រព័ន្ធតុលាការ។
សូមបញ្ជាក់ថា អាមេរិចបានព្យាយាមបណ្តេញលោក Nicolas Maduru ចេញពីតំណែង ដើម្បីដាក់ជំនួសមេដឹកនាំបក្សប្រឆាំង លោក Juan Guaodo ដែលខ្លួនបានគាំទ្រ ប៉ុន្តែរហូតមកដល់ពេលនេះ នៅមិនទាន់បានជោគជ័យនៅឡើយទេ៕
អត្ថបទប្រែសម្រួលដោយ៖ សុភ័ក្រ
ប្រភព៖ dailysabah