ភ្នំពេញ៖ ថ្លែងប្រាប់បណ្តាញសារព័ត៌មាន លោក ម៉ាក សឿន អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខប្រម៉ាញ់ និងនេសាទ បានឲ្យដឹងថា កម្ពុជាបានផលិតស្បៀងសល់ជារៀលរាល់ឆ្នាំ។
លោកបន្តថា ឆ្នាំ២០១៩ និងឆ្នាំ ២០២០នេះ ប្រទេសកម្ពុជា ផលិតស្បៀងបានចំនួនជាង ១០,៨ លានតោន សម្រាប់ទុកប្រើប្រាស់នៅឆ្នាំ២០២០។ បើទូទាត់សម្រាប់ការហូបចុកក្នុងស្រុក និងនាំចេញកម្ពុជា យើងនៅសល់ស្រូវប្រមាណ ៥,៧លានតោន ហើយបើគិតជាអង្ករនៅសល់ប្រមាណ ៣,៥លានតោន ដែលចំនួននេះ គឺទើបតែចូលដល់រដូវប្រមូលផលទៀតផង។
យោងតាមប្រកាសរបស់សហព័ន្ធស្រូវអង្ករកម្ពុជា ក៏ដូចជាក្រសួងពាណិជ្ជកម្មបច្ចុប្បន្ន កម្ពុជាមានស្រូវអង្ករគ្រប់គ្រាន់សម្រាប់ផ្គត់ផ្គង់ទូទាំងប្រទេស។លោក លន់ យ៉េង ជាអគ្គលេខាធិការសហព័ន្ធស្រូវអង្ករកម្ពុជា បានឲ្យដឹងថា សហព័ន្ធស្រូវអង្ករមានសមាជិកជារោងម៉ាស៊ីនកិនស្រូវចំនួនជាង៤០០ ជាក្រុមហ៊ុន ពីមធ្យម ទៅធំ ដែលមានបរិមាណស្តុកទុកមិនតិចជាង ១លាន៥សែនតោន។ ក្នុងករណីបន្ទាន់ អាចបញ្ចេញមកភ្នំពេញក្នុងមួយថ្ងៃ ចន្លោះពី ៥ ពាន់ ទៅ ៦ពាន់តោន។
ថ្វីត្បិតវិស័យកសិកម្មមានកំណើនប្រចាំឆ្នាំមិនសូវខ្លាំងដូចជាវិស័យផ្សេងៗទៀតក៏ដោយ ប៉ុន្ដែវិស័យនេះ នៅតែជាឆ្អឹងខ្នងដ៏សំខាន់មួយ ដើម្បីគាំទ្រដល់ការរីកលូតលាស់នៃសេដ្ឋកិច្ចរបស់កម្ពុជា។ ផលិតកម្មស្រូវ ក៏បានរួមចំណែកយ៉ាងច្រើន ដល់សន្តិសុខស្បៀង និងកាត់បន្ថយភាពក្រីក្រនៅកម្ពុជា។
យោងតាមសហព័ន្ធស្រូវអង្ករកម្ពុជា ក្នុងត្រីមាសទី១ នៃដើមឆ្នាំ២០២០នេះ កម្ពុជាសម្រេចបានការនាំចេញអង្ករក្រអូបចំនួន ៧៤% អង្ករស ចំនួន ២៤% អង្ករចំហុយ ចំនួន ១% និងអង្ករសរីរាង្គចំនួន ១%។ នៅក្នុងត្រីមាសទី១ ឆ្នាំ២០២០នេះដដែល អង្ករក្រអូបបានកើនចំនួន ១៤% អង្ករសបានកើនចំនួន ២៤៩% មានបរិមាណ ៥៤ ៤៧៦ តោន បើធៀបទៅនឹងត្រីមាសទី១ ឆ្នាំ២០១៩ បានត្រឹមតែ ១៥ ៦០៥ តោនតែប៉ុណ្ណោះ។
តាមការគណនាខាងលើ តម្លៃនៃការនាំចេញ FOB កម្ពុជា បានទទួលចំណូលពីការនាំចេញអង្ករទៅទីផ្សារអន្តរជាតិ ប្រមាណជា ១៦១ លានដុល្លារអាមេរិក នៅក្នុងត្រីមាសទី១ ឆ្នាំ២០២០នេះ ៕ ដោយ ៖ សម្ផស្ស