ប្រទេសថៃ៖ ក្រុមអ្នកពន្លត់អគ្គិភ័យមួយក្រុមនៅភាគខាងជើងប្រទេសថៃ បានបង្ខំចិត្តរត់ឡើងលើដើមឈើ ដើម្បីគេចពីហ្វូងសត្វដំរីព្រៃដែលពួកគេបានជួបចៃដន្យ ខណៈកំពុងប្រយុទ្ធនឹងភ្លើងឆេះព្រៃនៅក្នុងស្រុកអូមកយ នៃខេត្តឈៀងម៉ៃ។
ក្រុមពន្លត់អគ្គិភ័យបាននិយាយថា ពួកគេកំពុងស្ថិតនៅក្នុងតំបន់នោះដើរល្បាតសម្រាប់ភ្លើង នៅពេលនោះពួកគេបានប្រទះឃើញហ្វូងដំរីព្រៃតូចមួយ។ ដោយបារម្ភពីសុវត្ថិភាព ពួកគេក៏បាននាំគ្នាឡើងលើដើមឈើក្បែរនោះ ហើយសម្ងំនៅលើទីនោះរហូតដល់ដំរីទាំងនោះចាកចេញទៅ។
ស្រុកអូមកយ ស្ថិតនៅភាគខាងត្បូងនៃខេត្តឈៀងម៉ៃ គឺជាដែនជម្រកសត្វព្រៃដ៏ធំមួយ។ ជម្រកនេះមានប្រភេទសត្វកម្រ និងជិតផុតពូជរួមមានដំរីអាស៊ីព្រៃ។
ក្រុមពន្លត់អគ្គិភ័យបានស្ថិតនៅក្នុងតំបន់នោះជាផ្នែកមួយនៃកិច្ចខិតខំប្រឹងប្រែង ដើម្បីប្រយុទ្ធប្រឆាំងនឹងការឆេះព្រៃទូទាំងខេត្ត។ អ្នកភូមិជាច្រើនចាប់ផ្តើមបង្កាត់ភ្លើងឲ្យឆេះ ដើម្បីធ្វើឲ្យប្រសើរសម្រាប់ការប្រមូលផលផ្សិតប្រចាំឆ្នាំ។
ទន្ទឹមនេះផងដែរ បុរសពីរនាក់ត្រូវបានចាប់ខ្លួនពាក់ព័ន្ធនឹងអគ្គិភ័យ ដែលបានបង្កការបំផ្លិចបំផ្លាញរាលដាលនៅក្នុងឧទ្យានជាតិ Doi Suthep-Pui ។ បុរសទាំងពីរត្រូវបានគេចោទប្រកាន់ថា បានចាប់ផ្តើមបង្កអគ្គិភ័យនៅក្នុងតំបន់ព្រៃមួយក្នុង Ban Thung Pong Tai, Moo 9 Ban Pong ក្នុងស្រុក Hang Dong។
បុរសទាំង ២ នាក់បានសារភាពថា ខ្លួនបានចាប់ផ្តើមដុតភ្លើងឲ្យឆេះមែន ប៉ុន្តែពួកគេបានអះអាងថា ពួកគេបានព្យាយាមបង្កើតខ្សែការពារភ្លើង។ អ្វីៗទាំងអស់ខាងលើនេះ គឺដើម្បីផ្តល់ការការពារពីអគ្គិភ័យផ្សេងទៀតនៅក្នុងឧទ្យាន ប៉ុន្តែភ្លើងរបស់ពួកគេបានរាលដាលហួសពីការគ្រប់គ្រង ។ ទោះយ៉ាងណា ពួកគេត្រូវបានចោទប្រកាន់ពីបទឧក្រិដ្ឋ ក្នុងករណីធ្វើឲ្យខូចខាតសម្បត្តិជាតិដ៏ធំធេងនេះ ៕
ប្រែសម្រួល៖ លឹម ហុង (ប្រភព៖ chiangraitimes)