ភ្នំពេញ៖ កំហឹងមហាជន នៅពេលនេះ បានជំរុញលោក ហែម ដារិទ្ធិ អភិបាលនៃគណៈអភិបាលខណ្ឌពោធិ៍សែនជ័យ ឲ្យសមត្ថកិច្ចតាមចាប់បុរសម្នាក់ជាម្ចាស់ផ្ទះជួល ដែលបានរួមដៃជាម្តាយ ប្រព្រឹត្តនូវទង្វើដ៏សាហាវប្រៀបដូចធ្វើទៅលើសត្វធាតុ ដោយចាប់ស្ត្រីមានផ្ទៃពោះចងដៃនឹងទ្វារបងផ្ទះ ដោយសារជម្លោះជុំវិញរឿងរើបន្ទប់ពីផ្ទះខ្លួន ឲ្យបានឆាប់រហ័សតាមដែលអាចធ្វើទៅបាន ។
នេះបើយោងតាមហ្វេសប៊ុក Satawath FC 20 បានបង្ហោះនៅមុននេះបន្តិច (ថ្ងៃទី០៦ មេសា) ឲ្យដឹងថា៖ “លោកហែម ដារិទ្ធិ អភិបាលនៃគណៈអភិបាលខណ្ឌពោធិ៍សែនជ័យជំរុញឲ្យសមត្ថកិច្ចតាមចាប់បុរសម្នាក់ជាម្ចាស់ផ្ទះជួល ដែលបានចាប់នារីមានផ្ទៃពោះម្នាក់ចងដៃជាប់នឹងទ្វាររបង ឲ្យបានឆាប់រហ័ស”។
លោកហែម ដារិទ្ធិ៖ ក្នុងនាមខ្ញុំបាទជាប្រធានគណៈបញ្ជាការឯកភាពខណ្ឌពោធិ៍សែនជ័យ នឹងជំរុញឲ្យសមត្ថកិច្ចទាំងអស់តាមចាប់ជនបង្កហេតុម្នាក់នេះ ដើម្បីដោះស្រាយទៅតាមផ្លូវច្បាប់។
យោងតាមពាក្យបណ្តឹងរបស់ជនរងគ្រោះឈ្មោះ អឿម នៀក ភេទស្រី អាយុ៣៣ឆ្នាំ បានរៀបរាប់ថា កាលពីថ្ងៃទី៥ ខែមេសា ឆ្នាំ២០២០ វេលាម៉ោង១រសៀល មុនពេលកើតហេតុ ជនរងគ្រោះបានទៅជួយរើ អីវ៉ាន់របស់បងស្រី ឈ្មោះ ស្រីម៉ៅ ដែលបានជួលបន្ទប់លេខ A4 ស្ថិតនៅភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ ។ ពេលជនរងគ្រោះទៅដល់បានរើអីវ៉ាន់ដាក់លើម៉ូតូកង់បី ដើម្បីយកមកបន្ទប់ជួលថ្មី នៅក្បែរបន្ទប់ជួលចាស់ ស្របពេលនោះ ម្ចាស់ផ្ទះចាស់ឈ្មោះ អ៊ូ ប៊ុនធី ភេទប្រុស អាយុ៤១ឆ្នាំ ជាមន្ត្រីសាធារណការ និង ម្នាក់ទៀតឈ្មោះ ស្រេង ឆេងលីន ភេទស្រី ៦១ឆ្នាំ ជាម្ចាស់ផ្ទះជួលបានមករករឿង រហូតមានទំនាស់ពាក្យសម្តី ដោយយកជនរងគ្រោះជនរងគ្រោះជាប់នឹងទ្វារតែម្តង ។
ស្ត្រីរងគ្រោះកំពុងសម្រាលព្យាបាលនៅមន្ទីរពេទ្យ សម្ភព សុវណ្ណារ៉ា ។ ចំណែកឯ ជនសង្ស័យជាមន្ត្រីសាធារណការ បានរត់គេចខ្លួនហើយ ។
គួរបញ្ជាក់ថា៖ ហេតុការណ៍នេះ បានកើតឡើងកាលពីថ្ងៃទី៥ មេសា ២០២០ នៅចំណុចក្រោយរោងចក្រឥណ្ឌា ភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ៕ ដោយ៖ លឹម ហុង
