ភ្នំពេញ ៖ ប្រមុខរាជរដ្ឋាភិបាលកម្ពុជា បានចេញសារថ្លែងអំណរគុណដល់បងប្អូនអាជីវករលក់ស្រូវអង្ករ ដែលមិនដំឡើងថ្លៃ ក្នុងខណៈដែលប្រទេសកំពុងប្រយុទ្ធប្រឆាំងនឹងជំងឺឆ្លងកូវីដ-១៩។
នៅលើបណ្ដាញទំនាក់ទំនងសង្គមហ្វេសប៊ុក នាថ្ងៃទី៦ ខែមេសា ឆ្នាំ២០២០ សម្ដេចតេជោ មានប្រសាសន៍ថា” អរគុណបងប្អូនអាជីវករលក់ស្រូវអង្ករ ទូទាំងប្រទេស ដែលបើកដំណើរការលក់ស្រូវអង្ករ ក្នុងតម្លៃធម្មតា មិនដំឡើងថ្លៃ ដើម្បីប្រជាពលរដ្ឋយើង មានភាពងាយស្រួល ក្នុងការទិញយកទៅទទួលទាន ជាពិសេសក្នុងស្ថានភាពដែលប្រទេសយើង កំពុងប្រយុទ្ធប្រឆាំងនឹងជំងឺឆ្លងកូវីដ-១៩”។
សម្តេចនាយករដ្ឋមន្ត្រី បានថ្លែងថា “អរគុណបងប្អូនអាជីវករទាំងអស់ ដែលមានការយល់ដឹងខ្ពស់ ពីវិធីការពារមិនឱ្យឆ្លងរោគកូវីដ-១៩ ពីម្នាក់ទៅម្នាក់ គឺពីអ្នកលក់ទៅអ្នកទិញ និងពីអ្នកទិញទៅអ្នកលក់ និងពីអ្នកទិញទៅអ្នកទិញ។ សូមបងប្អូនសហការ និងបន្តធ្វើតាមការណែនាំរបស់ក្រសួងសុខាភិបាល។ ដើម្បីសុវត្ថិភាពទាំងអស់គ្នា សូមឧស្សាហ៍ដុសលាងសម្អាតដៃជាប្រចាំ និងសូមពាក់ម៉ាសការពារឱ្យបានគ្រប់ៗគ្នា”៕ ដោយ៖កូឡាប
