ភ្នំពេញ៖ ឯកឧត្តមអភិបាលរាជធានី បញ្ជាក់ថា ក្នុងស្ថានភាពបែបនេះ គ្មានការចម្លងថ្មី COVID-19 នោះទេ រហូតថ្ងៃទី៣០ខែមេសា ខាងមុខ បើមិនមានអ្វីប្រែប្រួលទេ នោះប្រទេសកម្ពុជាយើង គឺអាចរួចចាកផុតពីជំងឺ កូវីដ១៩នេះហើយ។
អភិបាលរាជធានីភ្នំពេញ បានណែនាំដល់អភិបាលខណ្ឌទាំង១៤ ឱ្យយកចិត្តទុកដាក់ត្រូវតែចុះទៅដល់មូលដ្ឋានរបស់ប្រជាពលរដ្ឋ ពិសេសណែនាំដល់ចៅសង្កាត់ បន្តឱ្យផ្សព្វផ្សាយពីវិធីការពារ និងទប់ស្កាត់ការឆ្លងជំងឺ COVID-19 ដល់ប្រជាពលរដ្ឋ និងសហគមន៍ ។
ឯកឧត្តម ឃួង ស្រេង បានថ្លែងបែបនេះ នៅថ្ងៃទី៦ ខែមេសា ឆ្នាំ២០២០ ក្នុងពិធី ចែកអាល់កុល និងម៉ាស ជាអំណោយរបស់រដ្ឋបាលរាជធានីភ្នំពេញ ជូន ឱ្យទៅសង្កាត់ទាំង១០៥ និងខណ្ឌទាំង១៤ ចំណុះឲ្យរដ្ឋបាលរាជធានីភ្នំពេញ ។
ឯកឧត្តម បានបន្តថា បើឃើញថា កន្លែងណា ឬតំបន់ណាមួយមានការប្រមូលផ្ដុំខុសពីអ្វីដែលជាការណែនាំ របស់ក្រសួងសុខាភិបាល ត្រូវតែពន្យល់និងណែនាំពួកគាត់ ធ្វើយ៉ាងណាទប់ស្កាត់ឲ្យបាននូវជំងឺនេះ។ អាជ្ញាធរមូលដ្ឋានត្រូវគ្រប់គ្រងឲ្យបាននូវពលករមកពីប្រទេសថៃ និងមកពីប្រទេសផ្សេងទៀត មករស់នៅក្នុងមូលដ្ឋានរបស់យើង ដោយត្រូវធ្វើរបាយការណ៍ជាក់លាក់មួយមករដ្ឋបាលរាជធានី ហើយនឹងដាក់ឲ្យគាត់នៅដាច់ដោយឡែកពីគេ ក្នុងរយៈពេល១៤ថ្ងៃ។
ការអនុវត្តបែបនេះ មិនត្រឹមតែជួយគាត់ទេ តែយើងអាចជួយគ្រួសារគាត់និងសហគមន៍រស់នៅរបស់គាត់ ឲ្យជៀសផុតពីជំងឺ COVID-19 ។
ឯកឧត្តម បញ្ជាក់ថា ក្នុងស្ថានភាពបែបនេះរហូតថ្ងៃទី៣០ខែមេសា ខាងមុខ បើមិនមានអ្វីប្រែប្រួលទេ នោះប្រទេសកម្ពុជាយើង គឺអាចរួចចាកផុតពីជំងឺ កូវីដ១៩នេះហើយ ពេលនោះសេដ្ឋកិច្ច នឹងអ្វីៗគ្រប់យ៉ាងវានឹងល្អប្រសើរ ជាធម្មតាឡើងវិញ។ ដូច្នេះទេយើងត្រូវតែរួមគ្នាដើម្បីអនុវត្តការងារនេះឲ្យបានជោគជ័យ ចំណែកបងប្អូនពលករមកពីក្រៅប្រទេស ពិសេសប្រទេសថៃ បើមានបញ្ហាខ្វះខាតត្រូវជួយដោះស្រាយគាត់ បើដោះស្រាយមិនបាន រាយការណ៍មករដ្ឋបាលរាជធានីភ្នំពេញភ្លាម»។
អភិបាលរាជធានី សូមឱ្យអាជ្ញាធរមូលដ្ឋាន ពន្យល់ឱ្យអ្នកមានជំងឺក៏ដូចពលរដ្ឋទូទៅ ដើម្បីជាសផុតពីជំងឺឆ្លងត្រូវនាំគ្នាពាក់ម៉ាស និងលាងដៃជាប្រចាំ ជៀសវាងឆ្លងទៅអ្នកដទៃនិងក្រុមគ្រួសារ ក៏ដូចជាសហគមន៍។
ឯកឧត្តម អភិបាលរាជធានីភ្នំពេញ បានបញ្ជាក់ឲ្យដឹងថា ក្នុងរយៈពេល៦ថ្ងៃនេះ នៅរាជធានីភ្នំពេញ មិនមានអ្នកឆ្លងជំងឺ COVID-19 នោះទេ ខណៈដែលនៅទូទាំងប្រទេស ក្នុងរយៈពេលបីថ្ងៃចុងក្រោយនេះដែរ ក៏មិនមានអ្នកឆ្លង COVID-19 ដែរនោះ ហើយទន្ទឹមនឹងនេះក៏បានព្យាបាលឱ្យបានជាសះស្បើយ៥៣នាក់ និងអ្នកកំពុងព្យាបាលចំនួន៦១នាក់។
ឯកឧត្តម ឃួង ស្រេង បានបញ្ជាក់ឲ្យដឹងថា កាលដែលមិនកើតមានឡើងនូវជំងឺកូវីដ១៩ នៅរាជធានីភ្នំពេញក្នុងរយៈពេល៦ថ្ងៃនេះ គឺពិតជាបង្ហាញឲ្យឃើញពីការខិតខំប្រឹងប្រែងរបស់អាជ្ញាធរមូលដ្ឋាន ដូចជាសមត្ថកិច្ចទាំងអស់ដែលបានរួមគ្នា ទប់ស្កាត់នូវជំងឺរាតត្បាតដ៏សាហាវនេះ។ ប៉ុន្តែទោះបីជាយ៉ាងណា លោកក៏បានធ្វើការណែនាំឲ្យអាជ្ញាធរក៏ដូចជាសមត្ថកិច្ចទាំងអស់កុំភ្លេចខ្លួន ត្រូវតែមានការប្រុងប្រយ័ត្នខ្ពស់ចំពោះការរីករាលដាលនៃជំងឺនេះ ដោយត្រូវចុះណែនាំប្រជាពលរដ្ឋឲ្យចេះការពារខ្លួន ទៅតាមការណែនាំរបស់ក្រសួងសុខាពិបាល៕ ដោយ៖កូឡាប