បាត់ដំបងៈ មន្ត្រីជាន់ខ្ពស់ក្រសួងអភិវឌ្ឍន៍ជនបទ បានណែនាំ និងជំរុញដល់អាជ្ញាធរមូលដ្ឋាន និងថ្នាក់ដឹកនាំក្រុមការងារ នៅតាមបណ្តាឃុំទាំង៦ ក្នុងស្រុកសំពៅលូន ខេត្តបាត់ដំបង ដោយផ្តោតទៅលើអ្នកដែលទីទ័លក្រ និងក្នុងគោលបំណង ដើម្បីជួយពួកគាត់ ក្នុងការដោះស្រាយនូវបញ្ហាប្រឈម របស់ពួកគាត់ទាំងនោះ ឲ្យបានដល់គោលដៅពិតប្រាកដជាក់ស្តែង។
ឯកឧត្តម សៅ ជីវន្ត រដ្ឋលេខាធិការក្រសួងអភិវឌ្ឍន៍ជនបទ និងជាប្រធានក្រុមការងារថ្នាក់ជាតិ ចុះជួយស្រុកសំពៅលូន បាននាំយកថវិកា៦លានរៀល អង្ករចំនួន៦តោន និងគ្រឿងឧបភោគបរិភោគមួយចំនួន ដើម្បីប្រគល់ជូនដល់អាជ្ញាធរមូលដ្ឋាន ដើម្បីត្រៀមបង្ការជួយដល់ប្រជាពលរដ្ឋ ដែលកំពុងតែជួបនូវបញ្ហាប្រឈមខ្វះខាត ទីទ័លក្រីក្រខ្លាំងជាងគេ ពិសេសផ្តោតលើក្រុមគ្រួសារ និងប្រជាពលរដ្ឋដែលបាត់បង់នូវជីវភាពប្រចាំថ្ងៃ ដោយសារតែការចម្លង និងការរាតត្បាតដោយមេរោគផ្លូវដង្ហើមធ្ងន់ធ្ងរ កូវីដ-19 កាលពីរសៀលថ្ងៃទី៦ ខែមេសា ឆ្នាំ២០២០ ។
ឯកឧត្តម សៅ ជីវ័ន្ត បានមានប្រសាសន៍ថា ដើម្បីកិច្ចការសំខាន់ៗចំពោះមុខ ក្នុងការត្រៀមបង្ការ ក្នុងការជួយដល់ប្រជាពលករខ្មែរ ដែលបានវិលត្រឡប់ពីប្រទេសថៃ ចូលមករស់នៅក្នុងស្រុកកំណើតវិញ និងប្រជាពលរដ្ឋដែលកំពុងតែ ជួបនូវបញ្ហាប្រឈម និងទីទ័លក្រីក្រខ្លាំងជាងគេ រស់នៅតាមបណ្តាភូមិ-ឃុំ ដោយសារតែវិបត្តិការរាតត្បាតពីជំងឺឆ្លងកូវីដ-១៩ ដែលធ្វើឲ្យពួកគាត់បាត់បង់ នូវពលកម្ម ដើម្បីជីវភាពរស់នៅប្រចាំថ្ងៃ។
បើតាមឯកឧត្តម សៅ ជីវន្ត តាមរយៈសកម្មភាពក្នុងការចុះទៅតាមខ្នងផ្ទះរបស់ពួកគាត់ ដើម្បីចែកជូននូវស្បៀងនិងគ្រឿងឧបភោគ បរិភោគដល់ពួកគាត់ ដើម្បីជាការឆ្លើយតបឲ្យបានទាន់ពេលវេលាជួយដល់ពួកគាត់ ជួយដល់បងប្អូនទីទ័លក្រ កំពុងជួបការលំបាកខ្លាំងជាងគេ និងស្របតាមការណែនាំ ពីប្រមុខនៃរាជរដ្ឋាភិបាលកម្ពុជា ជាពិសេសពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងារចុះជួយខេត្តបាត់ដំបង៕ ដោយៈអ៊ុងសារុំ