តាកែវ៖ស្ថានីយទឹកស្អាតបត់រកានៅផ្សារបត់រកា ភូមិព្រៃទទឹង ឃុំសំរោង ស្រុកសំរោង ខេត្តតាកែវ កាលពីថ្ងៃម្សិលមិញនេះ ថ្ងៃទី៦ ខែមេសា ឆ្នាំ២០២០ បានចេញនៅសេចក្តីជូនដំណឹងមួយ ដល់សាធារណជន និងអតិថិជនទាំងអស់ ឲ្យបានជ្រាបថា ស្ថានីយ៍ទឹកស្អាតបត់រកា មិនមានទឹកស្អាតគ្រប់គ្រាន់សម្រាប់ផ្គត់ផ្គង់ទឹកស្អាត ជូនអតិថិជនប្រើប្រាស់នារដូវប្រាំងនេះទេ ( ជួនមាន ជួនអត់ ឬទឹកមានតែកករខ្លះផង)។
ស្ថានីយទឹកស្អាតបត់រកានៅផ្សារបត់រកា ក៏បានបញ្ជាក់ពីមូលហេតុថា ដោយសារឆ្នាំនេះ ស្ថានភាពនៃល្បាយទឹកភ្លៀង ឆាប់អស់នៅចុងរដូវវស្សា និងមិនមានភ្លៀងកក់ខែទាល់តែសោះ បូករួមទាំងមានការបើកទឹកបឹងបត់រកា ដើម្បីយកទឹកទៅស្រោចស្រពស្រូវរដូវប្រាំង របស់បងប្អូនប្រជាពលរដ្ឋ នៅស្រុកព្រៃកប្បាសផងដែរ ។
អាស្រ័យហេតុនេះ ស្ថានីយទឹកស្អាតបត់រកា សូម លោក លោកស្រី អតិថិជនទាំងអស់ ជ្រាបជាព័ត៌មាន និងចូលរួមសន្សំសំចៃ និងរក្សាទឹកទុកប្រើប្រាស់ នាថ្ងៃខាងមុខ ៕ដោយ៖តាកែវ