តាកែវ៖បន្ទាប់ពីទទួលដំណឹងពីអាជ្ញាធរពាក់ព័ន្ធ ជាមួយនឹងការដាក់ស្លាកកំណត់តម្លៃប្រេងសាំង នៅតាមស្ថានីយប្រេងមួយចំនួន ដែលដាក់លក់ ខុសពីការប្រកាសរបស់ក្រសួងពាណិជ្ជកម្មលោក ប៉ោ លាងគង់ ប្រធានសាខាការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ(កបប)ខេត្តតាកែវ សហការជាមួយមន្ទីរពាណិជ្ជកម្មខេត្ត និងអាជ្ញាធរ នៅព្រឹកថ្ងៃទី៧ ខែមេសា ឆ្នាំ២០២០ បានចុះពិនិត្យស្ថានីយប្រេងនានា នៅក្នុងស្រុកបាទី ស្រុកសំរោង និងស្រុកព្រៃកប្បាស ហើយបានចាត់វិធានការផ្លូវច្បាប់ ដោយធ្វើការផាកពិន័យទៅលើស្ថានីយប្រេងចំនួន ៣កន្លែង ដែលល្មើសនឹងប្រកាសរបស់ក្រសួង ដោយលក់ប្រេងក្នុងតម្លៃថ្លៃ មានកន្លែងខ្លះ ២.៥០០រៀល និងកន្លែងខ្លះទៀតដល់តែ ២.៧០០រៀល ។
លោក ប៉ោ លាងគង់ បានឲ្យដឹងថា ស្ថានីយប្រេងទាំង ៣កន្លែង ដែលត្រូវផាកពិន័យនោះ គឺស្ថិតនៅក្នុងឃុំចំប៉ា ដោយស្ថានីយប្រេងទី១ មានម្ចាស់ឈ្មោះណាណា ធ្វើការផាកពិន័យចំនួន២លានរៀល និងស្ថានីយទី២ មានម្ចាស់ឈ្មោះ នីស្រីនីម និងស្ថានីយទី៣ មានឈ្មោះ ប៉ុន សុផល នៅស្រុកបាទី ត្រូវបានផាកពិន័យជាទឹកប្រាក់ចំនួន២លានរៀលដូចគ្នា។
លោក បានបន្តថា ការចុះផាកពិន័យនេះ សាខាកាំកុងត្រូលនឹងធ្វើជារៀងរហូត នៅទូទាំងខេត្តតាកែវតែម្តង ហើយបើម្ចាស់ស្ថានីយណា ធ្លាប់ផាកហើយនៅតែបន្តលក់ថ្លៃទៀត នឹងបិទលែងឲ្យធ្វើអាជីវកម្មតែម្ដង។
គួរបញ្ជាក់ផងដែរថា តាមសេចក្តីជូនដំណឹងរបស់ក្រសួងពាណិជ្ជកម្មកម្ពុជា ចេញផ្សាយនៅថ្ងៃទី១ ខែមេសា ឆ្នាំ២០២០ បានបង្ហាញថា តម្លៃប្រេងសាំងដែលត្រូវលក់រាយតាមស្ថានីយ ចាប់ពីថ្ងៃទី១ ដល់ថ្ងៃទី១៥ ខែមេសា គឺប្រេងសាំងមានតម្លៃត្រឹម ២៣៥០រៀល ក្នុងមួយលីត្រ ខណៈប្រេងម៉ាស៊ូត តម្លៃ ២៤៥០រៀលក្នុងមួយលីត្រ៕ដោយ៖តាកែវ