ប្រទេសថៃ ៖ នៅថ្ងៃទី៦ ខែមេសា ឆ្នាំ ២០២០ សារព័ត៌មាន Arun Amarin បានរាយការណ៍ថា អ្នកគ្រូពេទ្យម្នាក់ឈ្មោះ Manisara Jaiboon ឬហៅថា Nid ដែលជាគិលានុបដ្ឋាយិកាជំនាញមួយរូប នៅមន្ទីរពេទ្យឈៀងរ៉ៃប្រាឆានុរ៉ូ ក្នុងខេត្តឈៀងរ៉ៃ បានទទួលមរណភាពកាលពីថ្ងៃទី៥ ខែមេសា ឆ្នាំ២០២០ បន្ទាប់ពីបានខិតខំធ្វើការនឿយហត់ពេករហូតដួលស្លាប់ ដើម្បីបម្រើការព្យាបាលជូនអ្នកជំងឺកូវីដ១៩ ។
គេបានរកឃើញថា អ្នកស្រី Manisara គឺបណ្ដាលមកពីជំងឺគាំងបេះដូង និងជំងឺរលាកសួត ដែលត្រូវបានស្នើសុំឲ្យមានការបរិច្ចាគឈាម តាមអ៊ីនធឺណិត ហើយមនុស្សជាច្រើនបានបរិច្ចាគឈាមជូនអ្នកស្រី ប៉ុន្តែអ្វីៗមិនអាចមានលទ្ធភាពជួយសង្គ្រោះជីវិតអ្នកគ្រូពេទ្យបាន។
ទន្ទឹមនេះផងដែរ ពិភពលោកអ៊ីនធឺណិតបានបង្ហាញនូវការកាន់ទុក្ខ ដ៏ក្រៀមក្រំបំផុត ចំពោះការពលីជីវិតដ៏ធំធេងមួយនេះ របស់អ្នកគ្រូ Manisara ហើយសង្ឃឹមថា អ្នករាល់គ្នាគួរបន្តស្នាក់នៅផ្ទះ ដើម្បីកាត់បន្ថយ និងឈានបញ្ឈប់ការការរីករាលដាលនៃជំងឺកូវីដ ១៩ នេះសម្រាប់ប្រទេសជាតិទាំងមូល ហើយក៏មិនត្រូវមានបុគ្គលិកពេទ្យណាម្នាក់ ត្រូវស្លាប់ដោយសារការខិតខំ ក្នុងបុព្វហេតុនេះទៀតឡើយ៕
ប្រែសម្រួល៖ លឹម ហុង (ប្រភព៖ kapook)