ខេត្តប៉ៃលិនៈ ប្រជាពលរដ្ឋដែលមានជីវភាពខ្វះខាត និងរងផលប៉ះពាល់ជំងឺ Covid-19 ជាច្រើនជាក់ស្ដែង បានទទួលស្បៀងអាហារពីអាជ្ញាធរខេត្តប៉ៃលិន និងក្រុមការងារគណបក្សប្រជាជនកម្ពុជាខេត្តប៉ៃលិន និងផ្សព្វផ្សាយអំពីវិធានការបង្ការ ទប់ស្កាត់ការរីករាលដាលជំងឺកូវីដ-១៩ នៅតាមខ្នងផ្ទះ។
ឯកឧត្តម ផាន់ ចាន់ធុល អភិបាលខេត្តប៉ៃលិននិងជាប្រធានគណបក្សប្រជាជនកម្ពុជាខេត្តប៉ៃលិន បានមានប្រសាសន៍ពី
ការព្រួយបារម្ភ ចំពោះជំងឺកូវី១៩ បានធ្វើឱ្យក្រុមហ៊ុន សហគ្រាសនិងកន្លែងការងារមួយចំនួន ត្រូវបានបិទទ្វារ បណ្តាលឱ្យប្រជាពលរដ្ឋខ្លះអត់ការងារធ្វើ ហើយពលរដ្ឋខ្លះទៀតដែលធ្វើជាពលករនៅក្រៅប្រទេស ត្រូវបង្ខំចិត្ត វិលត្រឡប់មកកាន់ស្រុកកំណើតនិងលំ
នៅដ្ឋានវិញ ដូច្នេះធ្វើឱ្យប៉ះពាល់ដល់សេដ្ឋកិច្ចក្រុមគ្រួសារ របស់ពួកគាត់។ ជាក់ស្តែងនៅថ្ងៃនេះ ក្រុមការងារគណបក្សប្រជាជនកម្ពុជាខេ
ត្ត បាននាំយកអំណោយជាស្បៀងអាហារ មកឧបត្ថម្ភដល់ពួកគាត់នៅតាមខ្នងផ្ទះ ព្រោះមិនអាចធ្វើការប្រមូលផ្តុំមនុស្សច្រើនទេ។ បើទោះបីជាអំណោយស្បៀងអាហារទាំងនេះ មិនបានបំពេញតាមតម្រូវការរបស់បងប្អូនពិតមែន តែក៏អាចដោះស្រាយបានមួយកម្រិតផងដែរ។
ឯកឧត្តម ផាន់ ចាន់ធុល បានអំពាវនាវសូមលោកតា លោកយាយ អ៊ំពូមីងនិងបងប្អូនទាំងអស់ ត្រូវខិតខំប្រឹងប្រែងប្រកបមុខរបរចិញ្ជឹមជីវិតនិងបង្កបង្កើតផល ដាំដំណាំឱ្យបានកាន់ច្រើន ដើម្បីបង្កើនជីវភាព ឱ្យបានធូរស្រាលជាងមុន។ ពិសេស ត្រូវរស់នៅស្អាត ហូបស្អាត មានអនាម័យ ដោយត្រូវពាក់ម៉ាសនៅកន្លែងសាធារណៈ និងលាងសម្អាតដៃឱ្យបានជាប្រចាំ ក្នុងន័យចូលរួម បង្ការ និងទប់ស្កាត់ការរីករាលដាលនៃជម្ងឺ កូវីត ១៩។ ការជួយគ្នាក្នុង គ្រាលំបាកគឺជាវប្បធម៌របស់គណបក្សប្រជាជនកម្ពុជា ហើយគណបក្សប្រជាជនកម្ពុជា ក្រោមការដឹកនាំរបស់ សម្តេចតេជោ សែន បានធ្វើឱ្យប្រទេសជាតិមានសុខសន្តិភាពនិងបានខិតខំកសាងអភិវឌ្ឍន៍ប្រទេសជាតិ ឱ្យ មានការរីកចម្រើនលើគ្រប់វិស័យ មានដូចជា ផ្លូវ ស្ពាន សាលារៀន មន្ទីរពេទ្យ ប្រព័ន្ធធារាសាស្ត្រ។ ជាពិសេសបានខិតខំប្រឹងប្រែងដោះស្រាយនូវរាល់ការ លំបាក និងសំណូមពររបស់ប្រជាពលរដ្ឋ នៅទូទាំងប្រទេស ដោយមិនបណ្តោយឲ្យប្រជាពលរដ្ឋណាម្នាក់ស្លាប់ ដោយអត់បាយនិងមិនបានដោះស្រាយនោះឡើយ។
ឯកឧត្តម ផាន់ ចាន់ធុល បានបញ្ជាក់ថា គណបក្សប្រជាជនកម្ពុជានៅជាមួយប្រជាជន និងរួមសុខរួមទុក្ខជាមួយប្រជាជនគ្រប់ពេលវេលា។
ឯកឧត្តម ផាន់ ចាន់ធុល បានមានប្រសាសន៍ក្រើនរំលឹក ដល់អជ្ញាធរមូលដ្ឋានគ្រប់ជាន់ថ្នាក់ និងក្រុមគ្រូពេទ្យជំនាញ ត្រូវបន្តធ្វើការផ្សព្វផ្សាយអប់រំនៅតាមមូលដ្ឋាន ជាពិសេស នៅតាមទីប្រជុំជននិងទីសាធារណៈឲ្យបានផុលផុស អំពីវិធានការបង្ការ និងទប់ស្កាត់ការរីករាលដាល ជំងឺកូវីដ ១៩ផងដែរ៕ ដោយៈអ៊ុងសារុំ