ខេត្តស្វាយរៀងៈ អភិបាលខេត្តស្វាយរៀង បានលើកឡើងថា ការជួយឧបត្ថម្ភដោយ អាជីវករ រស់នៅឃុំប្រសូតិ ជូនរដ្ឋបាលខេត្តនាពេលនេះ ដែលពិតជាឆ្លើយតបទៅនឹងស្ថានភាព និងតម្រូវការចាំបាច់ នាពេលបច្ចុប្បន្ន ព្រោះថា ជំងឺកូវីដ១៩ ដែលបានអូសបន្លាយជាច្រើនខែកន្លងមកនេះ មិនត្រឹមតែបង្កផលប៉ះពាល់ដល់សុខុមាលភាព ប្រជាជននៅក្នុងប្រទេសរបស់យើងប៉ុណ្ណោះទេ ប៉ុន្តែក៏បានប៉ះពាល់ស្ទើរគ្រប់ផ្នែក រួមទាំងជីវភាពរស់នៅរបស់ប្រជាពលរដ្ឋ ជាពិសេសប្រជាពលរដ្ឋងាយរងគ្រោះ ។
លោក ម៉ែន វិបុល អភិបាលខេត្តស្វាយរៀង នៅថ្ងៃទី៧ ខែមេសា ឆ្នាំ២០២០នេះ បានអញ្ជើញចូលរួមទទួលយកអំណោយជាអង្ករ ចំនួន ១០តោន ដែលឧបត្ថម្ភដោយលោក ចាន់ រតនៈ និងភរិយា អាជីវករ រស់នៅឃុំប្រសូតិ ស្រុកស្វាយទាប ផ្ដល់ជូនរដ្ឋបាលខេត្តសម្រាប់ប្រើប្រាស់តាមតម្រូវការជាក់ស្ដែង នៅក្នុងដំណាក់កាល នៃការអនុវត្តយុទ្ធនាការប្រយុទ្ធប្រឆាំងនឹងជំងឺកូវីដ១៩ ដែលពិធីនេះបានប្រព្រឹត្តទៅនៅសាលប្រជុំសាលាខេត្តស្វាយរៀង។
លោកអភិបាលខេត្ត បានថ្លែងនូវការអរគុណយ៉ាងជ្រាលជ្រៅចំពោះលោក ចាន់ រតនៈ និងភរិយា ដែលបានជួយឧបត្ថម្ភជាអង្ករ ចំនួន ១០តោន ផ្ដល់ជូនរដ្ឋបាលខេត្តនាពេលនេះ ដែលពិតជាឆ្លើយតបទៅនឹងស្ថានភាព និងតម្រូវការចាំបាច់ នាពេលបច្ចុប្បន្ន ព្រោះថា ជំងឺកូវីដ១៩ ដែលបានអូសបន្លាយជាច្រើនខែកន្លងមកនេះ មិនត្រឹមតែបង្កផលប៉ះពាល់ដល់សុខុមាលភាព ប្រជាជននៅក្នុងប្រទេសរបស់យើងប៉ុណ្ណោះទេ ប៉ុន្តែក៏បានប៉ះពាល់ស្ទើរគ្រប់ផ្នែក រួមទាំងជីវភាពរស់នៅរបស់ប្រជាពលរដ្ឋ ជាពិសេសប្រជាពលរដ្ឋងាយរងគ្រោះ ។
លោកក៏បានលើកឡើងថា សកម្មភាពដ៏ប្រពៃនេះ ពិតជាកាយវិការដ៏ល្អប្រសើរសបញ្ជាក់ឲ្យឃើញ ពីការរួមចំណែកមិនអាចខ្វះបានពីផ្នែកឯកជន នៅក្នុងការចូលរួមដោះស្រាយបញ្ហាប្រឈម របស់ប្រជាពលរដ្ឋ ដែលនាពេលបច្ចុប្បន្ននេះ ទន្ទឹមនឹងការអនុវត្តការងារប្រយុទ្ធប្រឆាំងនឹងជំងឺកូវីដ១៩ រដ្ឋបាលខេត្តក៏បានគិតគូរយកទុកដាក់អំពីសុខទុក្ខ និងជីវភាពរស់នៅរបស់ប្រជាពលរដ្ឋ តាមរយៈការរៀបចំសម្ភារ និងគ្រឿងឧបភោគបរិភោគត្រៀម ផ្ដល់ជូនបងប្អូនប្រជាពលរដ្ឋ ដែលមានការខ្វះខាត ប្រជាពលរដ្ឋដែលរងនូវផលប៉ះពាល់ ក៏ដូចជាបងប្អូនពលករដែលទើបត្រឡប់មកពីប្រទេសថៃ ហើយអំណោយជាអង្ករនាពេលនេះ គឺពិតជាឆ្លើយតបទៅនឹងតម្រូវការជាក់ស្ដែងដែលរដ្ឋបាលខេត្តកំពុងត្រៀមរៀបចំ ៕ ដោយ៖ វ៉ៃកូ
