អ្នកជំងឺ COVID-19 ជិត ២.០០០នាក់ បានស្លាប់នៅអាមេរិចក្នុងរយៈពេលត្រឹម ២៤ម៉ោងចុងក្រោយ ដែលវាគឺជាកំណត់ត្រាថ្មីស្លាប់ច្រើនបំផុតក្នុងរយៈពេលមួយថ្ងៃ។ នេះបើតាមទិន្នន័យរបស់សកលវិទ្យាល័យ Johns Hopkins កាលពីថ្ងៃអង្គារ។
កំណត់ត្រាថ្មីនៃការស្លាប់មនុស្សចំនួន ១.៩៣៩ក្នុងមួយថ្ងៃនៅអាមេរិច បណ្តាលឲ្យចំនួនអ្នកស្លាប់សរុបកើនដល់ ១២.៧២២នាក់។ អាមេរិចកំពុងរត់តាមពីក្រោយអ៊ីតាលី ដែលមានអ្នកស្លាប់សរុបចំនួន ១៧.១២៧នាក់ និងអេស្ប៉ាញដែលមានអ្នកស្លាប់ ១៣.៧៩៨នាក់។ ចំណែកអ្នកឆ្លងសរុបបានកើនដល់ ៣៩៨.៨០៩នាក់។
ប្រធានាធិបតីអាមេរិច ដូណាល់ ត្រាំ បានការពារវិធានការឆ្លើយតបរបស់គាត់ទៅនឹងវិបត្តិកូរ៉ូណា ហើយកាលពីថ្ងៃអង្គារ លោកបានរិះគន់ដល់អង្គការសុខភាពពិភពលោក ដែលមានប្រតិកម្មឆ្លើយតបយឺត។
លោកត្រាំ ត្រូវបានគេរិះគន់យ៉ាងខ្លាំង ដោយសារតែការមើលងាយចំពោះវីរុសនោះ ដោយលោកបានប្រដូចវាទៅនឹងជំងឺផ្តាសាយធំធម្មតា និងបាននិយាយថាវាស្ថិតក្រោមការគ្រប់គ្រង ប៉ុន្តែក្រោយមក លោកបានទទួលស្គាល់ថា វាគឺជាគ្រោះអាសន្នខ្លាំងដល់ជាតិ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia/ Johns Hopkins
