រដ្ឋាភិបាលចិនបានដកបំរាមដើរហើរនៅក្នុងទីក្រុងវូហាន និងអនុញ្ញាតិឲ្យប្រជាជនធ្វើដំណើរធម្មតាវិញ ក្រោយពេលបិទអស់រយៈពេល ១១សប្តាហ៍។
ការធ្វើដំណើរតាមរថភ្លើង និងតាមដងផ្លូវត្រូវបានបើកឲ្យដំណើរការវិញធម្មតា។
ការប្រកាសអនុញ្ញាតិឲ្យប្រជាជនដើរហើរវិញនេះ កើតឡើងក្រោយពេលចិនប្រកាសថាគ្មានអ្នកស្លាប់ដោយសារវីរុសកូរ៉ូណាកាលពីថ្ងៃអង្គារម្សិលមិញ។ វាគឺជាលើកដំបូងហើយដែលមិនមានអ្នកស្លាប់ ចាប់តាំងពីចិនបានចាប់ផ្តើមប្រកាសតួលេខប្រចាំថ្ងៃមក។
កាលពីខែមុន នៅពេលដែលទីក្រុងវូហាន ដែលមានប្រជាជន ១១លាននាក់ បានប្រកាសពីការគ្មានករណីឆ្លងថ្មីរយៈពេល ២សប្តាហ៍ពេញ ផ្សារទំនើប ត្រូវបានបើកដំណើរវិញ។ ប្រជាជនមួយចំនួនក៏ត្រូវបានអនុញ្ញាតិឲ្យចេញក្រៅផ្ទះរយ់ពេល ២ម៉ោងផងដែរ។
ចាប់ពីថ្ងៃពុធនេះទៅ ប្រជាជនមួយចំនួនអាចនឹងប្រើប្រាស់មធ្យោបាយសាធារណៈបាន ប្រសិនជាពួកគេបានធ្វើការស្កេន QR កូដ ដែលកូដនេះនឹងប្រាប់ពីស្ថានភាពសុខភាពពួកគេ។
នៅថ្ងៃពុធនេះដែរ ជើងហោះហើរចំនួន ២០០គ្រោងនឹងហោះហើរចេញពីទីក្រុងវូហាន ដោយផ្ទុកអ្នកដំណើរ ១០.០០០នាក់។
សូមបញ្ជាក់ថា ការឆ្លងថ្មីនៅចិនបានថតចុះជាបន្តបន្ទាប់មកដល់កម្រិតសូន្យ ប៉ុន្តែប្រទេសនេះកំពុងប្រឈមនឹងការឆ្លងថ្មីដែលមានប្រភពមកពីក្រៅប្រទេស តាមរយៈការវិលត្រឡប់ចូលស្រុកវិញ របស់ប្រជាជនចិន។
កាលពីថ្ងៃចន្ទ មានការឆ្លងចំនួន ៣២ករណី ថយចុះពីចំនួន ៣៩ករណី នៅថ្ងៃអាទិត្យ។
ការឆ្លងទាំង ៣២ករណីកាលពីថ្ងៃចន្ទ សុទ្ធតែឆ្លងមកពីខាងក្រៅ នៅពេលមានការធ្វើដំណើរពីក្រៅស្រុកចូលក្នុងប្រទេស បណ្តាលឲ្យតួលេខនៃអ្នកឆ្លងមកពីខាងក្រៅកើនដល់ចំនួន ៩៨៣នាក់។
ចំនួនអ្នកឆ្លងវីរុសកូរ៉ូណាសរុបនៅក្នុងប្រទេសចិន មាន ៨២.៧៤០នាក់ និងមានអ្នកស្លាប់ច្រើនជាង ៣.៣០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC