ប្រទេសថៃ៖ មេភូមិម្នាក់នៅភាគខាងត្បូងប្រទេសថៃ បានបាញ់សម្លាប់ព្រះសង្ឃមានគំនិតអភិវឌ្ឍន៍ដ៏ល្បីម្នាក់ និងដៃគូរបស់លោកម្នាក់ទៀត ក្នុងករណីចោទថាបានរំលោភបម្រាមគោចរពេលយប់ ដើម្បីទប់ស្កាត់ការឆ្លងរាលដាលកូវីដ-១៩ ។ ការបាញ់សម្លាប់ដ៏សាហាវនេះ បានកើតឡើងនៅជិតផ្លូវចូលវត្ត Khao Phela ក្នុងខេត្ត Surat Thani ។
ក្រោយទទួលបានដំណឹងនេះ នៅវេលាម៉ោង ២ យប់រំលងអធ្រាត្រ ឈានចូលថ្ងៃទី៧ មេសា លោក Wisut Intharakamnoen អភិបាលស្រុក Tha Chana បានដឹកនាំកម្លាំងចុះទៅកាន់កន្លែងកើតហេតុ ។ នៅពេលមកដល់ ពួកគេបានរកឃើញរថយន្តកែច្នៃ១គ្រឿង នៅលើដងផ្លូវ និងបុរសម្នាក់បានដេកស្លាប់ ដោយរងរបួសដោយគ្រាប់កាំភ្លើងនៅត្រង់ក ។ សមត្ថកិច្ចក្រោយមក បានស្គាល់អត្តសញ្ញាណបុរសរងគ្រោះដែលមានឈ្មោះ Churat Khongkhlai អាយុ ៤៨ ឆ្នាំ ជាអ្នករស់នៅ Surat Thani ។
នៅប្រហែលចម្ងាយ ១០ ម៉ែត្រ ពីនេះ សមត្ថកិច្ចក៏បានរកឃើញសាកសពមួយទៀត គឺជាព្រះសង្ឃ Phra Chonlathan Thavaro Kanchanabut ដែលជាចៅអធិការនៅវត្ត Khao Phela មានព្រះជន្ម ៤៩ ឆ្នាំ ។
ជំនួយការអធិការស្រុក លោក Panyaporn Wattanapramote បាននិយាយថា ខណៈពេលដែលលោកកំពុងរាយការណ៍ ពីការរំលោភបម្រាមគោចរ ទៅលោកអធិការស្រុកតាមរយៈទូរស័ព្ទ លោកក៏បានឮសំឡេងកាំភ្លើងផ្ទុះឡើង។ នៅពេលនោះគាត់បានទៅពិនិត្យ ហើយបានរកឃើញថា មេភូមិបានឈ្មោះ Manop Kopin អាយុ ៥៥ ឆ្នាំ បានបាញ់សម្លាប់ព្រះសង្ឃ និងឧបាសិកាម្នាក់។
ក្នុងអំឡុងពេលសួរចម្លើយរបស់ប៉ូលិស មេភូមិរូបនេះបានអះអាងថា គាត់បានឃើញព្រះសង្ឃដកកាំភ្លើងខ្លីមួយដើម ហើយឈ្មោះ Churat បានចាប់កាន់កាំបិត។ គាត់មានការភ័យខ្លាច ដោយជឿថាពួកគេនឹងវាយប្រហារមកលើគាត់ ជាហេតុធ្វើឲ្យសម្រេចចិត្តបាញ់ ៣ គ្រាប់ ទៅលើពួកគេបណ្តាលឲ្យស្លាប់ទាំងពីរនៅនឹងកន្លែង។
សមត្ថកិច្ចបានឃាត់ខ្លួនមេភូមិខាងលើ ដើម្បីសាកសួរបន្ត។ ហើយមន្ត្រីកោសល្យវិច័យ ក៏បានប្រមូលភស្តុតាងពីកន្លែងកើតហេតុផងដែរ។
សូមបញ្ជាក់ថា Phon Chonlathan ជាព្រះសង្ឃមានគំនិតក្នុងការអភិវឌ្ឍន៍កសាងដ៏គំរូមួយ នៅក្នុងស្រុក Chana ។ លោកតែងបានដើរតួនាទីយ៉ាងសំខាន់ ក្នុងការដឹកនាំប្រជាជនក្នុងតំបន់ ដើម្បីកសាង និងដាំដើមឈើផងដែរ។ នៅឆ្នាំ ២០១៦ លោកបានទទួលពានរង្វាន់ Hemmara សម្រាប់គំរូល្អក្នុងវិស័យការពារព្រៃឈើ និងបរិស្ថាន។ លើសពីនេះទៅទៀត ២ ឆ្នាំក្រោយមក លោកបានទទួលពានរង្វាន់មួយទៀតសំរាប់ធ្វើជាគំរូល្អនេះផងដែរ៕
ប្រែសម្រួល៖ លឹម ហុង (ប្រភព៖ chiangraitimes)