ស្ទឹងត្រែង: បុរសនាក់ដើររើសផ្លែសំរង ត្រូវសត្វខ្លាឃ្មុំខាំរងរបួសធ្ងន់ ដែលហេតុការណ៍នេះ បានកើតឡើងនៅចំណុចលើភ្នំមួយ នៅកណ្តាលព្រៃ ស្ថិតក្នុងភូមិសាស្ត្រភូមិគីរីវង្សាលើ ឃុំសន្តិភាព ស្រុកសៀមប៉ាង ខេត្តស្ទឹងត្រែង កាលពីថ្ងៃទី៧ ខែមេសា ឆ្នាំ២០២០។
លោកវរសេនីយ៍ឯក ជឹម អេន អធិការនគរបាលស្រុកសៀមប៉ាង បានឲ្យដឹងថា ជនរងគ្រោះត្រូវខ្លាឃ្មុំខាំនោះទី ១ ឈ្មោះ រ អេន ញ៉ាំ អាយុ ២២ ឆ្នាំ ជនជាតិកាវ៉ែត រងរបួសធ្ងន់ ទី ២ ឈ្មោះអើយ រ៉េ អាយុ ២៩ឆ្នាំជនជាតិកាវែត ជនរងគ្រោះទាំងពីរនាក់ រស់នៅ ភូមិគិរីវង្សាលើ ឃុំសន្តិភាព ស្រុកសៀមប៉ាង ខេត្តស្ទឹងត្រែង។
លោកអធិការស្រុកសៀមប៉ាង បានបន្តឲ្យដឹងទៀតថា នៅថ្ងៃកើតហេតុ ជនរងគ្រោះទាំងពីរនាក់ បាននាំគ្នាដើររើស និងបេះផ្លែសំរង នៅតាមព្រៃភ្នំត្រង់ចំណុចភ្នំកើតហេតុខាងលើ ក៏បានប្រទះឃើញសត្វខ្លាឃ្មុំមេមួយក្បាល មានកូនតូច កំពុងបណ្ដើរកូន។ សត្វខ្លាឃើញជនរងគ្រោះទាំងពីរនាក់ ក៏បានស្ទុះមកខាំខ្វេះក្រញៅនឹងក្រចក បណ្ដាលឲ្យខ្ទេចមុខបុរសម្នាក់ មើលស្ទើរតែមិនយល់។ អ្នករួមដំណើរទៅជាមួយ ក៏ស្ទុះទៅជួយ តែត្រូវសត្វខ្លាឃ្មុំខាំរងរបួសទាំងពីរនាក់។
ខ្លាឃ្មុំ បន្ទាប់ពីខាំមនុស្សអស់ចិត្ត ក៏រត់គេចបាត់។ ក្រោយកើតហេតុ អ្នករងរបួសបានផ្តល់ដំណឹង ដល់អ្នកភូមិ និងរាយការណ៍មកសមត្ថកិច្ច។ ជនរងគ្រោះពីរនាក់ ត្រូវប្រជាពលរដ្ឋ រួមជាមួយសមត្ថកិច្ច បាននាំមកកាន់មណ្ឌលសុខភាព ស្រុកសៀមប៉ាង ប៉ុន្តែក្រោយពីរងរបួសធ្ងន់ធ្ងរ ជនរងគ្រោះទាំងពីនាក់ ត្រូវបានបញ្ជូនមកកាន់មន្ទីរពេទ្យបង្អែកខេត្តស្ទឹងត្រែងជាបន្ត៕ដោយ:សុខុម
