កណ្ដាល៖ព្រឹកថ្ងៃទី៨ ខែមេសា ឆ្នាំ២០២០ នេះកម្លាំងចម្រុះបានបើកកិច្ចប្រតិបត្តិការចុះឆែកឆេ ឃ្លាំងស្តុកទុកគ្រឿងក្នុងសត្វមួយកន្លែង ដែលក្រុមឈ្មួញនាំមកពីប្រទេសថៃ ដែលស្ថិតនៅភូមិជ័យឧត្តម១ ឃុំសំរោងធំ ស្រុកកៀនស្វាយ ខេត្តកណ្តាល ។
ការងារនេះដឹកនាំសម្របសម្រួលនីតិវិធី ដោយ លោក ឯក ស៊ុនរស្មី ព្រះរាជអាជ្ញារង នៃអយ្យការអមសាលាដំបូងខេត្តកណ្តាល ,លោក នៃ ចារី អភិបាលរងខេត្តកណ្តាល លោក លី សុជាតិ ស្នងការរង ទទួលបន្ទុកនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកណ្តាល, ជំនាញខាងកាំកុងត្រូល ,លោកព្រុំ សំណាង អធិការប៉ូលិសស្រុកកៀនស្វាយ និងមានការចូលរួមពីកម្លាំង អាជ្ញាធរមូលដ្ឋានជាច្រើននាក់ទៀតផងដែរ។
ខណៈកំពុងតែឆែកឆេ និងពិនិត្យ គ្រឿងក្នុងសត្វសង្ស័យមានសារធាតុគីមីនេះ ស្រាប់តែនៅម៉ោងជាង១រសៀលថ្ងៃខែឆ្នាំដដែល នេះក៏មានបុរសម្នាក់ឈ្មោះ ហ៊ឹម សុខហឿន ចេញមុខមកបញ្ជាឲ្យសមត្ថកិច្ចដកខ្លួន ដោយអះអាងថា មានអ្នកធំទូរស័ព្ទមកប្រាប់ហើយ ម្តេចមិនដកថយ..? បន្ទាប់ពីបញ្ជាសមត្ថកិច្ច និងសម្លុតនោះ កម្លាំងក៏បាននាំខ្លួនជនរកស៊ីនាំគ្រឿង ក្នុងសត្វពីបរទេសរូបនេះ ទៅអធិការដ្ឋាននគរបាលស្រុកកៀនស្វាយ ដើម្បីសាកសួរ។
លោក នៃ ចារី អភិបាលរងខេត្តកណ្តាល បានឲ្យដឹងថា គ្រឿងក្នុងសត្វ ពោះវៀនជ្រូក គោ ក្បាលមាន់ ទា ។ល។ នឹងត្រូវយកទៅដុតកម្ទេចចោល។
គេបានរាយការណ៍មកថា៖ នៅម៉ោង២រសៀលថ្ងៃទី៨ នេះ កម្លាំងចម្រុះបង្កើតគណៈកម្មការមួយ ដើម្បីបិទទីតាំងឃ្លាំងខាងលើ ជាបណ្តោះអាសន្ន រង់ចាំរកពេលដឹកយកទៅកម្ទេចចោល អាចពេលល្ងាចនេះ ឬព្រឹកស្អែក។
ប្រសិនបើសមត្ថកិច្ច មិនបានបង្ក្រាបទាន់ពេលវេលាទេនោះ ម្ល៉េះគ្រឿងក្នុងសត្វ២កុងតឺន័រនេះ នឹងរងផលប៉ះពាល់ល់សុខភាពប្រជាជន ដែលទិញយកទៅធ្វើជាម្ហូបអាហារ ទទួលទាននោះកម្រិតណានោះទេ៕ដោយ៖កូឡាប