ខេត្តប៉ៃលិនៈ ឯកឧត្តម ផាន់ ចាន់ធុល អភិបាលខេត្តប៉ៃលិន បានជំរុញដល់មន្ត្រីកិច្ចសន្យា ដែលជាកម្មករ អ្នកអនាម័យ អ្នកថែរសួនច្បារសាធារណៈ របស់សាលាខេត្តទាំងអស់ ត្រូវចូលរួមសហការរៀបចំទីក្រុង ទីប្រជុំជនក្នុងខេត្តប៉ៃលិន ឲ្យមានអនាម័យ សណ្ដាប់ធ្នាប់ល្អ ដើម្បីទីក្រុងស្អាត រមណីយដ្ឋានស្អាត សេវាល្អ ជាពិសេសត្រូវចូលរួមជួយផ្សព្វផ្សាយ បំផុសប្រជាពលរដ្ឋ ឱ្យចូលរួមសហការ ក្នុងចលនាប្រឡងប្រណាំងទីក្រុងស្អាតផងដែរ។
អភិបាលខេត្តប៉ៃលិន បានយកស្បៀងអាហារនិងថវិកាមួយចំនួន ដើម្បីយកទៅដោះស្រាយជីវភាពប្រចាំថ្ងៃជួនដល់មន្ត្រីជាប់កិច្ចសន្យាក្របខ័ណ្ឌសាលាខេត្ត និងមន្ត្រីកិច្ចសន្យាផ្នែកអនាម័យ កំពុងបម្រើរការងារ ជាកម្មករ បោសសម្អាត និងថែទាំសួនសាធារណៈក្នុងខេត្តប៉ៃលិនដែលមានជីវភាពខ្វះខាតក្នុងការរស់នៅ កាលពីរសៀលថ្ងៃទី៨ខែមេសាឆ្នាំ២០២០។
ឯកឧត្តម ផាន់ ចាន់ធុល អភិបាលខេត្តប៉ៃលិន បានមានប្រសាសន៍ថា ការចែកអំណោយនាពេលនេះ គឺជាការយកចិត្តទុកដាក់របស់ថ្នាក់ដឹកនាំ ចំពោះមន្ត្រីក្រោមឱវាទ ដែលជួបការលំបាក ដើម្បីចូលរួមចំណែក ដោះស្រាយជីវភាព ពិសេសបងប្អូនមន្ត្រីកិច្ចសន្យា ជាកម្មករ អ្នកអនាម័យ អ្នកថែរសួនច្បារសាធារណៈ របស់សាលាខេត្តប៉ៃលិន។ សូមបងប្អូនមន្ត្រីកិច្ចសន្យាទាំងអស់ ត្រូវខិតខំប្រឹងប្រែង បំពេញការងាររបស់ខ្លួនឲ្យបានល្អ ទៅតាមតួនាទីភារកិច្ច ដែលថ្នាក់លើបានប្រគល់ជូន។
ការខិតខំបំពេញការងារ ចំពោះមុខកន្លងមក ហើយក្នុងឱកាសបុណ្យចូលឆ្នាំ ប្រពៃណីជាតិខ្មែរខាងមុខនេះ សូមបងប្អូនកម្មករទាំងអស់ ទទួលបាននូវសុខភាពល្អ ជៀសផុតពីជំងឺផ្សេងៗ និងជំងឺកូរ៉ូណាឬកូវីដ១៩។ នៅពេលបងប្អូនត្រឡប់ទៅផ្ទះវិញ សូមមេត្តាចូលរួមជួយផ្សព្វផ្សាយ ស្តីពីវិធីបង្កា ទប់ស្កាត់ការរីករាលដាល ជំងឺកូវីដ ១៩ តាមការណែរនាំរបស់រាជរដ្ឋាភិបាលកម្ពុជា និងក្រសួងសុខាភិបាល។ ចំពោះបងប្អូន ដែលមានគ្រួសារ ធ្វើពលករនៅក្រៅប្រទេស ហើយត្រឡប់មកស្រុកកំណើតវិញ សូមនៅដាច់ដោយឡែកពីគេ រយៈ១៤ថ្ងៃ ដើម្បីឲ្យដឹងថា មិនមានការឆ្លងវីរុសកូវីដ ១៩ ៕ដោយៈអ៊ុងសារុំ