ភ្នំពេញ៖ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ហេង សួរ បានឲ្យដឹងថា តាមរយៈសេចក្តីសំរេចរដ្ឋាភិបាល និងសេចក្តីជូនដំណឹងរបស់ក្រសួងនោះ កំលាំងពលកម្មកម្មករនិងកម្មការនី ដែលបំពេញការងារ នៅថ្ងៃទី១៣ ដល់ថ្ងៃទី ១៦ ខែមេសា ឆ្នាំនេះ ត្រូវបានច្បាប់ចាត់ទុកជាថ្ងៃធ្វើការធម្មតា មានប្រាក់ឈ្នួល ១០០% ដូចថ្ងៃធម្មតា។
ឯកឧត្តមបានគូសបញ្ជាក់ថា ប៉ុន្តែនៅថ្ងៃខាងមុខ ប្រសិនជារដ្ឋកំណត់យករយៈពេលណាមួយឱ្យឈប់ ៥ថ្ងៃ សងថ្ងៃចូលឆ្នាំ ហើយប្រសិនជាក្នុងអំឡុងពេល ៥ថ្ងៃនោះ រោងចក្រឱ្យកម្មករធ្វើការ នោះរោងចក្រត្រូវបង់ប្រាក់ឈ្នួលលើស ១០០%។
រដ្ឋាភិបាល បានប្រកាសលើកពេលចូលឆ្នាំខ្មែរ ឆ្នាំនេះ ដោយសារវិបត្តិនៃជំងឺកូវីដ១៩ ដោយតម្រូវឲ្យបុគ្គលិកកម្មករនិយោជិក នៅតាមសា្ថប័នរដ្ឋ និងឯកជន ធ្វើការដូចធម្មតា។
ឯកឧត្តម ហេង សួរ បានឲ្យដឹងទៀតថា ក្នុងករណីបងប្អូនកម្មករឈប់សំរាក ហើយបើមានច្បាប់ត្រឹមត្រូវ រោងចក្រអាចឲ្យគាត់ឈប់ ដោយកាត់ចេញពីថ្ងៃឈប់សម្រាក់ប្រចាំឆ្នាំ ចំនួន ១៨ថ្ងៃរបស់គាត់។ ហើយក្នុងករណី រោងចក្របានព្យួរ ឬបិទសកម្មភាព ហើយបងប្អូនកម្មករបានទៅដល់ផ្ទះហើយ សូមបន្តអនុវត្តតាមស្មារតី នៃលិខិតអនុញ្ញាត្តិឲ្យព្យួរកិច្ចសន្យាការងាររបស់ក្រសួង ឬ មន្ទីរការងារ រហូតចប់ រយៈពេលព្យួរកិច្ចសន្យាការងារនេះ។
គួរបញ្ជាក់ថា បច្ចុប្បន្ននៅកម្ពុជា ការចំណាយលើប្រាក់ឈ្នួលកម្មករក្នុងវិស័យកាត់ដេរសំលៀកបំពាក់ និងស្បែកជើង មានប្រមាណ ជាង ២ពាន់លានដុល្លារអាមេរិក ក្នុងមួយឆ្នាំៗ ខណៈដែលប្រាក់ឈ្នួលអប្បបរមាកម្មករម្នាក់ មាន១៩២ ដុល្លារអាមេរិក ក្នុងមួយខែ។ ជាមួយនិងរោងចក្រ ដែលបានចុះបញ្ជី ប្រមាណជិត ១.២០០ រោងចក្រ និងបានផ្ដល់ការងារដល់កម្មករប្រមាណ ៨០ម៉ឺននាក់ ក្នុងនោះ មានប្រមាណជាង ៨០% គឺជាស្ត្រី ៕ ដោយ ៖ សម្ផស្ស
