ភ្នំពេញ៖ បឹងសំរោង ស្ថិតនៅសង្កាត់សំរោង និងសង្កាត់ព្រែកព្នៅ ខណ្ឌព្រែកព្នៅ ត្រូវបានរំលោភបំពានកាន់កាប់ ពីជនខិលខូចមួយចំនួន អាចឈានដល់ការបាត់បង់ផ្ទៃបឹងទាំងមូល។
រដ្ឋបាលរាជធានីភ្នំពេញ នៅថ្ងៃទី៨ ខែមេសា ឆ្នាំ២០២០នេះ បានចេញសេចក្តីប្រកាសព័ត៌មានថា ប៉ុន្មានថ្ងៃនេះ មានការបំភ្លៃព័ត៌មានអំពីការចុះអនុវត្តវិធានការរដ្ឋបាលចំពោះអ្នករំលោភផ្ទៃបឹងសំរោង ដោយប្រកាន់ថា អាជ្ញាធរខណ្ឌព្រែកព្នៅ បានវាយតប់ ចាប់ខ្លួនមនុស្សខុសច្បាប់ និងការចោទប្រកាន់ផ្សេងៗ ពាក់ព័ន្ធការរំលោភផ្ទៃបឹងសំរោង ស្ថិតនៅសង្កាត់សំរោង និងសង្កាត់ព្រែកព្នៅ ខណ្ឌព្រែកព្នៅ ដោយគ្មានតុល្យភាពព័ត៌មានមុននឹងធ្វើការផ្សព្វផ្សាយ។
យោងតាមសេចក្តីប្រកាសព័ត៌មាន បានបញ្ជាក់ថា បឹងសំរោង ស្ថិតនៅសង្កាត់សំរោង និងសង្កាត់ព្រែកព្នៅ ខណ្ឌព្រែកព្នៅ ត្រូវបានរំលោភបំពានកាន់កាប់ពិជនខិលខូចមួយចំនួន អាចឈានដល់ការបាត់បង់ផ្ទៃបឹងទាំងមូល។ ដើម្បីរក្សាបាននូវប្រព័ន្ធបង្ហូរទឹក និងផ្ទៃបឹង រដ្ឋបាលរាជធានីភ្នំពេញ បានសម្រេចចាក់ទំនប់ តាមព្រំបឹងដើម្បីស្ថាបនាជាសួន និងផ្លូវថ្មើរជើងជុំវិញបឹង។ កាលពីថ្ងៃទី៣០ខែមីនាឆ្នាំ២០២០ រដ្ឋបាលខណ្ឌព្រៃព្នៅ បានចុះអនុវត្តវិធានការរដ្ឋបាលចំពោះអ្នករឹងរួស ទោះបីជាបានជូនដំណឹងច្រើនលើកច្រើនសារក៏ដោយ ដើម្បីអនុវត្តការកំណត់ព្រំបឹងសំរោង ។
រដ្ឋបាលរាជធានី បានលើកស្លាកប៉ាណូបង្ហាញគម្រោងរួចមកហើយ ដែលអនុវត្តតាមគម្រោងនេះ ស្របតាមអនុក្រឹត្យរបស់រាជរដ្ឋាភិបាល ស្តីពីការកំណត់ផ្ទៃបឹងសំរោង ជាសម្បត្តិសាធារណៈរបស់រដ្ឋ។ គណៈបញ្ជាការឯកភាពខណ្ឌព្រែកព្នៅ បានឃាត់ខ្លួនជនដែលមករារាំងការអនុវត្តការងាររបស់អ្នករាជការសាធារណៈ មកអប់រំណែនាំ និងបានអនុញ្ញាតឲ្យទៅគេហដ្ឋានវិញនៅថ្ងៃដដែល។ ការអនុវត្តនេះ គឺជាការយោគយល់អធ្យាស្រ័យ ចំពោះអ្នកកាន់កាប់ផ្ទៃបឹងខុសច្បាប់ទាំងអស់ ដោយមិនបានប្តឹងទៅតុលាការ ចោទប្រកាន់តាមទោសទណ្ឌនៃច្បាប់ភូមបាល មាត្រា២៥៩ ចែងថា “ការប៉ះពាល់កម្មសិទ្ធិនៃទ្រព្យសម្បត្តិសាធារណៈត្រូវផ្តន្ទាទោសពិន័យជាប្រាក់ពី៥លានរៀល ដល់៥០លានរៀល ឬផ្តន្ទាទោសដាក់ពន្ធនាគារពី១ឆ្នាំដល់៥ឆ្នាំ និងបទល្មើសព្រហ្មទណ្ឌផ្សេងៗទៀត ហើយការអនុវត្តនេះ ក៏ដើម្បីព្រមានទប់ស្កាត់កុំឲ្យមានការរំលោភកាន់កាប់ដីរដ្ឋនៅកន្លែងផ្សេៗជាបន្តបន្ទាប់ទៀតផងដែរ។
មុនឈានដល់ការអនុវត្តនេះ រដ្ឋបាលរាជធានី បានដោះស្រាយគោលនយោបាយជូនប្រជាពលរដ្ឋ ដែលចិញ្ចឹមត្រីលើផ្ទៃបឹងសំរោងបានចំនួន ៣២២គ្រួសារ ស្មើនឹង ៤២៦ស៊ងចិញ្ចឹមត្រី ដែលចំណាយថវិកាអស់ប្រមាណ ៩៦១.២០០.០០០រៀល ដោយពួកគាត់បានចូលរួមជាមួយរដ្ឋបាលរាជធានីភ្នំពេញ៕
ដោយ៖កូឡាប
