ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីជូនព័ត៌មាន ស្តីពីកិច្ចសន្ទនាតាមទូរស័ព្ទ រវាងសម្តេចតេជោ នាយករដ្ឋមន្ត្រី និងឯកឧត្តម Mike Pompeo រដ្ឋមន្ត្រីការបរទេសសហរដ្ឋអាមេរិក។ ចំណែករដ្ឋមន្ត្រីការបរទេសអាមេរិក ឯកឧត្តម Mike Pompeo បានថ្លែងសារលើបណ្តាញសង្គមផងដែរថា ឯកឧត្តមបាននិយាយជាមួយសម្តេច ហ៊ុន សែន ពីទំនាក់ទំនងការទូត៧០ឆ្នាំ រវាងប្រទេសទាំងពីរ និងជំនួយអាមេរិកលើការប្រយុទ្ធប្រឆាំង COVID19។ ឯកឧត្តម បានថ្លែងថា “កម្ពុជាមួយដែលប្រកបដោយអធិបតេយ្យភាពប្រជាធិបតេយ្យ ជាកម្ពុជាដ៏រឹងមាំមួយ”។
សូមបញ្ជាក់ថា កាលពីព្រឹកថ្ងៃទី៨ ខែមេសា នេះ សម្តេចតេជោ បានជួបសន្ទនាតាមទូរស័ព្ទជាមួយរដ្ឋមន្ត្រីការបរទេសអាមេរិក ឯកឧត្តម Mike Pompeo។ ដោយ សម្តេចនិងឯកឧត្តម Mike Pompeo បានលើកពីការពេញចិត្តចំពោះការជួយគ្នាទៅវិញទៅមក ក្នុងគ្រាលំបាក នៃការប្រយុទ្ធប្រឆាំងការរាលដាល ពេញពិភពលោក នៃCOVID-19 ដោយឯកឧត្តម Pompeo អរគុណកម្ពុជា ចំពោះការជួយសង្គ្រោះអ្នកធ្វើដំណើរលើនាវាកម្សាន្ត Westerdam ហើយសម្តេចអរគុណអាមេរិក ចំពោះជំនួយ និងកិច្ចសហការពីសំណាក់អ្នកជំនាញការនៃមជ្ឈមណ្ឌលបង្ការ និងគ្រប់គ្រងជំងឺរាតត្បាតអាមេរិក ក៏ដូចជាចំពោះទឹកប្រាក់២លានដុល្លារអាមេរិក សម្រាប់ជួយដល់ការប្រឆាំង ជំងឺរាតត្បាតCOVID-19នេះ។
ជាមួយនឹងការអះអាងថា អាមេរិកនឹងបន្តជួយគាំទ្រកម្ពុជាទាក់ទងដល់កិច្ចប្រឹងប្រែងនានា ដើម្បីសុខភាព សុវត្ថិភាពរបស់ប្រជាជនកម្ពុជា ឯកឧត្តម Mike Pompeo បានស្វាគមន៍សេចក្តីថ្លែងការណ៍របស់រាជរដ្ឋាភិបាលកម្ពុជា ស្តីពីអធិបតេយ្យជាតិ ។
សម្តេច ហ៊ុន សែន នាយករដ្ឋមន្ត្រី បានលើកឡើងពីតួនាទីសំខាន់ របស់អាមេរិកក្នុងក្របខ័ណ្ឌអាមេរិក ក្នុងតំបន់ និងការពេញចិត្តចំពោះវិភាគទាន និងសារសំខាន់របស់អាមេរិក ក្នុងការកាត់បន្ថយគម្លាត រវាងប្រទេសនានា ក្នុងតំបន់មេគង្គក្រោម និងសមាជិកអាស៊ានផ្សេងទៀត។
សម្តេច ហ៊ុន សែន និងឯកឧត្តម Pompeo បានចែករំលែកសមានចិត្តក្រៀមក្រំ ទៅវិញទៅមក ចំពោះគ្រួសារនៃជនរងគ្រោះទាំងឡាយ នៅអាមេរិក និងនៅតំបន់អាស៊ី ដោយសារ COVID-19។ សម្តេចបានផ្តាំផ្ញើការគាំទ្ររបស់សម្តេចជូនលោកប្រធានាធិបតី ដូណាល់ ត្រាំ ក្នុងកិច្ចប្រឹងប្រែងប្រយុទ្ធនឹងជំងឺកូវីដ១៩ ៕ ដោយ ៖ បញ្ញាស័ក្តិ