ខេត្តតាកែវ ៖ សមាជិកសហគមន៍សាមគ្គីត្រពាំងចក ក៏ដូចជា សហគមន៍កសិកម្មទូទាំងប្រទេស តាមរយៈឯកឧត្តមរដ្ឋមន្ត្រីកសិកម្ម ស្នើសុំឱ្យរាជរដ្ឋាភិបាល មេត្តាបន្តទប់ស្កាត់ ឬកាត់បន្ថយការនាំចូលផលិត ផលបន្លែពីប្រទេសជិតខាង សម្រាប់រយៈយូរអង្វែង តាមដែលអាចធ្វើទៅបាន។
ក្រសួងកសិកម្ម បានចេញប្រកាសព័ត៌មានថា ចេញពីស្រុកបន្ទាយមាស ខេត្តកំពត ឯកឧត្តមរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ វ៉េង សាខុន និងសហការី បានបន្តដំណើរមកកាន់ស្រុកត្រាំកក់ ខេត្តតាកែវ ដើម្បីពិនិត្យសកម្មភាពដាំបន្លែចម្រុះ និងចិញ្ចឹមគោរបស់លោកពូ អ៊ុន អឿន ដែលជាសមាជិកសហគមន៍កសិកម្មសាមគ្គីត្រពាំងចក ស្ថិតក្នុងភូមិត្រពាំងចក ឃុំត្រាំកក់ ខេត្តតាកែវ។
មិនខុសពីស្រុកបន្ទាយមាស ស្រុកត្រាំកក់ ជាស្រុកមួយ ឈានមុខគេនៅទូទាំងខេត្ត លើការងារផលិតកម្មបន្លែ និងការចិញ្ចឹមទាយកស៊ុត។ តាមការឱ្យដឹងពីលោកពូ អ៊ុន អឿន ថាបច្ចុប្បន្នបន្លែសុវត្ថិភាព គ្រប់ប្រភេទមានតម្លៃកើនឡើង យ៉ាងល្អប្រសើរ បន្ទាប់ពីរាជរដ្ឋាភិបាលបិទការនាំ ចូលពីខាងក្រៅ។ ព្រមជាមួយនឹងតម្លៃកើនឡើង កសិករ គ្រូបង្រៀន ខ្លះទៀតជាមន្ត្រី និងអាជ្ញាធរឃុំ ភូមិថានឹងងាកមកដាំដំណាំជាបណ្តើរៗឡើងវិញ ដើម្បីច្បាមយកឱកាសមាសនេះ ងាកមកបង្កើនផលិតភាពផលិតកម្មកសិកម្ម រួមចំណែកធានាដល់ការផ្គត់ផ្គង់ស្បៀងក្នុងស្រុក លើក កម្ពស់កម្រិតជីវភាពឱ្យកាន់តែល្អប្រសើរជាលំដាប់។ ហេតុផលនេះ ក្នុងនាមលោកពូជាសមាជិកសហគមន៍សាមគ្គីត្រពាំងចក ក៏ដូចជាសហគមន៍កសិកម្មទូទាំងប្រទេស តាមរយៈឯកឧត្តមរដ្ឋមន្ត្រី លោកពូបានស្នើសុំឱ្យរាជរដ្ឋាភិបាលមេត្តាបន្តទប់ស្កាត់ ឬកាត់បន្ថយការនាំចូលផលិត ផលបន្លែពីប្រទេសជិតខាងសម្រាប់រយៈយូរអង្វែង តាមដែលអាចធ្វើទៅបាន។
ដោយឡែកចំពោះបទពិសោធន៍ ដែលលោកពូទទួលបាននេះ គឺមានគុណប្រយោជន៍ជាមូលដ្ឋានគ្រឹះ យ៉ាងរឹងមាំ ដើម្បីឈានឆ្ពោះទៅធ្វើជាអ្នកផលិតអាជីពច្បាស់លាស់ ត្រឹមត្រូវតាមបច្ចេកទេស គុណភាព សុវត្ថិភាព ស្តង់ដារ ដែលនេះគឺជាទុនសម្រាប់ធ្វើការប្រកួតប្រជែង ជាមួយផលិតផលក្រៅប្រទេសនាពេលអនាគត។ មិនតែប៉ុណ្ណោះ សហគមន៍នេះ ក៏ជាប្រភពនៃការចែកចាយ ឬផ្លាស់ប្តូរបទពិសោធន៍ ដែលទទួលបានមកពីការអនុវត្តជាក់ស្តែង ជូនទៅដល់សហគមន៍ ឬអ្នកផលិតផ្សេងៗទៀត នៅទូទាំងស្រុកផងដែរ។ អ្វីដែលកាន់តែជឿទុកចិត្តលើការអនុវត្តបច្ចេកទេសនោះ គឺផ្ទៃដីជាង ២ ហិកតា លោកពូអាចទាញយកចំណូល បានពីសក្តានុពលដីនេះក្នុង ១ឆ្នាំចំនួន ៦៥ លានរៀល ពីការលក់ពហុបន្លែ ដោយមិនគិតពីចំណូលផលស្រូវ និងគោទៀតផង។ លើកម្រាមដៃដប់សំពះ ថ្លែងអំណរគុណទាំងទឹកចិត្តរំភើប សប្បាយរីករាយឥតឧបមា ជូនចំពោះសម្តេចតេជោ ហ៊ុន សែន នាយករដ្ឋមន្ត្រី ឯកឧត្តមរដ្ឋមន្ត្រីក្រសួងកសិកម្ម មន្ទីរកសិកម្មខេត្ត មន្ត្រីពាក់ព័ន្ធទាំងអស់ ដែលបានបង្កើតឱកាសមាស សម្រាប់ប្រជាសហគមន៍គ្រប់ៗគ្នា ក្នុងការចូលរួមជំរុញ ផលិតភាពផលិតកម្មកសិកម្ម ឆ្លើយតបតាមសេចក្តីត្រូវការ របស់អ្នកបរិភោគនាពេលបច្ចុប្បន្ន៕ដោយ៖បញ្ញាស័ក្តិ