ភ្នំពេញ៖ គណៈកម្មាធិការអចិន្ត្រៃយ៍រដ្ឋសភានៃព្រះរាជាណាចក្រកម្ពុជា បានបើកកិច្ចប្រជុំក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា នាព្រឹកថ្ងៃទី៩ ខែមេសា ឆ្នាំ២០២០ វេលាម៉ោង៩និង០០នាទី ។
អង្គប្រជុំបានធ្វើការពិភាក្សា និងអនុម័តតាមរបៀបវារៈ ដោយមានលទ្ធផលដូចខាងក្រោម៖
១- ការពិនិត្យសុំបញ្ចូលក្នុងរបៀបវារៈសម័យប្រជុំរដ្ឋសភា លើកទី៤ នីតិកាលទី៦ នូវ សេចក្តីព្រាងច្បាប់ស្តីពី ការគ្រប់គ្រងប្រទេសជាតិក្នុងភាពអាសន្ន។
២- ការពិនិត្យសមាសភាពលេខាធិការសម័យប្រជុំរដ្ឋសភាលើកទី៤ នីតិកាលទី៦ ចំនួន ៣រូប ៖ ឯកឧត្តម គោស៊ុំ សារឿត លោកជំទាវ អ៊ុន សុគន្ធា និងឯកឧត្តម ចេវ គឹមហេង។
៣- ការពិនិត្យ និងសម្រេចសេចក្តីព្រាងរបៀបវារៈ ទី៣ ទី៤ ទី៥ និងកាលបរិច្ឆេទបន្តសម័យប្រជុំ លើកទី៤ នីតិកាលទី៦។
សូមជម្រាបថា សេចក្តីព្រាងច្បាប់ស្តីពី ការគ្រប់គ្រងប្រទេសជាតិស្ថិតក្នុងភាពអាសន្ន ត្រូវបានរាជរដ្ឋាភិបាលប្រគល់ជូនតាមរយៈលិខិតលេខ២៩៧.លស.កបច ចុះថ្ងៃសុក្រ ១១កើត ខែចេត្រ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៣ ខែមេសា ឆ្នាំ២០២០ ដើម្បីស្នើសុំរដ្ឋសភាពិនិត្យ និងអនុម័តសេចក្តីព្រាងច្បាប់នេះ រួមមាន៥ជំពូក និង ១២មាត្រា ៖
-ជំពូកទី១ រួមមាន ២មាត្រា (ពីមាត្រា១ ដល់មាត្រា២) ចែងអំពីបទប្បញ្ញត្តិទូទៅ ដែលកំណត់អំពីគោលបំណង និងវិសាលភាព។
-ជំពូកទី២ រួមមាន ២មាត្រា (ពីមាត្រា៣ ដល់មាត្រា៤) ចែងអំពីបែបបទ នីតិវិធី និងលក្ខខណ្ឌនៃការដាក់ប្រទេសជាតិស្ថិតក្នុងភាពអាសន្ន។
-ជំពូកទី៣ រួមមាន ២មាត្រា (ពីមាត្រា៥ ដល់មាត្រា៦) កំណត់អំពីវិធានការក្នុងពេលប្រទេសជាតិស្ថិតក្នុងភាពអាសន្ន និងអំពីរបបរាយការណ៍អំពីវិធានការក្នុងភាពអាសន្នជូនទៅរដ្ឋសភា និងព្រឹទ្ធសភា។
-ជំពូកទី៤ រួមមាន ៤មាត្រា (ពីមាត្រា៧ ដល់មាត្រា១០) ចែងអំពីទោសប្បញ្ញត្តិដែលកំណត់អំពីបទរារាំងដល់កិច្ចប្រតិបត្តិការពេលប្រទេសជាតិស្ថិតក្នុងភាពអាសន្ន បទមិនគោរព វិធានពេលប្រទេសជាតិស្ថិតក្នុងភាពអាសន្ន ការទទួលខុសត្រូវព្រហ្មទណ្ឌរបស់នីតិបុគ្គល និងការទទួលខុសត្រូវរបស់អាជ្ញាធរមានសមត្ថកិច្ច។
-ជំពូកទី៥ រួមមាន ២មាត្រា (ពីមាត្រា១១ ដល់មាត្រា១២) ចែងអំពីអវសានប្បញ្ញតិដែលកំណត់អំពីនិរាករណ៍ និងការប្រកាសជាការប្រញាប់៕ ដោយ៖កូឡាប