អ្នកជំងឺនីហ្សេរីយ៉ាផ្ទុកជំងឺកូវីដ១៩ម្នាក់ ដែលត្រូវបានចោទប្រកាន់ថា បានខាំមុខរបស់គិលានុបដ្ឋាយិកាម្នាក់ ខណៈពេលស្ថិតក្រោមការជួយព្យាបាល និងដាក់នៅដាច់ដោយឡែក អាចប្រឈមនឹងការចោទប្រកាន់ពីបទឧក្រិដ្ឋ នៅពេលដែលគាត់បានជាសះស្បើយពីជំងឺ។
ហេតុការណ៍នេះបានកើតឡើងកាលពីថ្ងៃពុធ នៅមន្ទីរពេទ្យមួយក្នុងទីក្រុងក្វាងចូវ ខេត្តក្វាងទុង ប្រទេសចិន។
អ្នកវាយប្រហារដែលត្រូវបានគេស្គាល់អត្តសញ្ញាណមានឈ្មោះ Okonkwonwoye Chika Patrick អាយុ ៤៧ ឆ្នាំ បានបដិសេធមិនព្រមទទួលការព្យាបាលទេ ហើយបានព្យាយាមរត់ចេញពីមន្ទីរពេទ្យ។
Patrick ត្រូវបានចោទប្រកាន់បានរុញច្រាននិងវាយ ទៅលើស្ត្រីជាគិលានុបដ្ឋាយិកានោះ ដែលព្យាយាមបញ្ឈប់គាត់មិនអោយចេញពីមន្ទីរពេទ្យ ចុះទៅជាន់ផ្ទាល់ដី ។ ហើយខណៈពេលអ្នកជំងឺមានចិត្តកាចសាហាវរូបនេះ ក៏បានខាំមុខរបស់នាង ក្នុងពេលវាយប្រហារនោះផងដែរ។
បុរសរូបនេះ បានចូលប្រទេសចិនកាលនៅថ្ងៃទី ២០ ខែមីនា ហើយត្រូវបានធ្វើតេស្តវិជ្ជមានជំងឺកូវីដ១៩ ។ បន្ទាប់មក គាត់ត្រូវបានគេបញ្ជូនទៅមន្ទីរពេទ្យ ដើម្បីដាក់នៅឯកោ និងព្យាបាលនៅថ្ងៃទី ២៣ ខែមីនា។
វីដេអូដែលឥឡូវបានសាយភាយពេញបណ្តាញសង្គមចិន បង្ហាញពីមុខរបួសនៅជិតភ្នែករបស់គិលានុបដ្ឋាយិកា ដែលបានសម្រក់ទឹកភ្នែកយំខ្សឹកខ្សួលគួរឲ្យអាសូរ។ នាងក៏ត្រូវបានគេរាយការណ៍ថា បានរងរបួសស្រាលត្រង់ក និងចង្កេះផងដែរ។
ទោះយ៉ាងណា គេមិនទាន់ច្បាស់ថាតើការចោទប្រកាន់ ពីបទឧក្រិដ្ឋប្រភេទណា ដែលបុរសនោះអាចនឹងប្រឈមនោះទេ។ ក្រុមមន្ត្រីបាននិយាយថា សម្រាប់ពេលនេះ បុរសនេះកំពុងត្រូវបានព្យាបាល ស្ថិតនៅក្រោមការត្រួតពិនិត្យរបស់ប៉ូលីស ហើយនឹងត្រូវតែចោទប្រកាន់ទោសទណ្ឌ នៅពេលគាត់បានជាសះស្បើយពីជំងឺ៕
ប្រែសម្រួល៖ លឹម ហុង (ប្រភព៖ nextshark)
