បន្ទាយមានជ័យ ៖ មន្ត្រីការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ(កបប , CCF) សាខាខេត្ត និងមន្ត្រីមន្ទីរពាណិជ្ជកម្មខេត្តបន្ទាយមានជ័យ បានចុះពិនិត្យគុណភាព និងតម្លៃលក់អាល់កុល ជែលលាងដៃ សាប៊ូលាងដៃ និងម៉ាសមុខ ដោយបានរកឃើញនូវអាល់កុលក្លែងក្លាយ យកទៅកម្ទេចចោល ហើយធ្វើការណែនាំ និងអប់រំ ដោយសារតែជាករណីលើកដំបូង។
កាលពីថ្ងៃទី៨ ខែមេសា ឆ្នាំ២០២០ លោក សាន វិជ្ជាសារ៉ាវុធ ប្រធានសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប ៖ CCF) ខេត្តបន្ទាយមានជ័យ និងលោកដុំ វណ្ណឌី អនុប្រធានមន្ទីរពាណិជ្ជកម្មខេត្តបន្ទាយមានជ័យ បានដឹកនាំមន្ត្រីបានចុះត្រួតពិនិត្យគុណភាព តម្លៃលក់ និងប្រភពនូវផលិតផល ដូចខាងលើ នៅតាមឱសថស្ថានរង៧កន្លែង និងស្តង់២កន្លែង នៅផ្សារចម្ការគរ និងដងផ្លូវនៅសង្កាត់កំពង់ស្វាយ ក្រុងសិរីសោភ័ណ។
មន្ត្រី បានថ្លែងថា ផលិតផលទាំងនោះ ស្ទើរទាំងអស់ មានគុណភាពល្អ មានតម្លៃប្រក្រតីសមស្រប មិនឡើងថ្លៃខ្ពស់។
មន្ត្រីបានអរគុណដល់បងប្អូនអ្នកលក់ថា ធ្វើហ្នឹងស្របតាមការណែនាំរបស់រាជរដ្ឋាភិបាល ក្រសួងពាណិជ្ជកម្មក្រសួងសុខាភិបាល និងក្រសួងស្ថាប័ន អាជ្ញាធរជំនាញនានាហើយ ។ ប៉ុន្តែនាឱកាសនោះ មន្ត្រី បានរកឃើញនូវអាល់កុលក្លែងក្លាយ ហើយត្រូវដកហូតបានចំនួន២៤ដប ស្មើចំណុះ១២លីត្រ រួចបានយកទៅកម្ទេចចោល ។
ចំពោះទីតាំង អ្នកផលិតផលិត មន្ត្រីជំនាញថា នឹងស្រាវជ្រាវរក ដើម្បីចាត់វិធានការតាមច្បាប់ ។
ដោយសារថា ការលក់នេះធ្វើដោយអចេតនា និងលើកដំបូង ហើយអ្នកលក់មិនបានដឹងអ្វី ទើបជំនាញមិនចាប់ខ្លួនម្ចាស់ផលិតផល ប៉ុន្តែបានអប់រំ ណែនាំកុំឲ្យអាជីវករនោះ សហការល្អនឹងសមត្ថកិច្ច ហើយដាច់ខាតកុំលក់ផលិតផលក្លែងក្លាយនោះ ។
ដល់រសៀលថ្ងៃទី៨ ខែមេសាឆ្នាំ២០២០ថា លោកសាន វិជ្ជាសារ៉ាវុធ និងមន្ត្រីដដែល រួមនឹងលោកប៊ុក ឡាយជី ប្រធានមន្ទីរពាណិជ្ជកម្ម ខេត្តចុះផ្សព្វផ្សាយការកំណត់ រូបមន្តសម្រាប់កែសម្រួលថ្លៃលក់រាយប្រេងឥន្ធនៈ នៅកម្ពុជា ស្របតាមគោលនយោបាយចេញថ្មី របស់រាជរដ្ឋាភិបាល ពោលគឺតាមតម្លៃទីផ្សាអន្តរជាតិ ដែលបានធ្លាក់ចុះពេលមេរោគជំងឺកូវីដ១៩ រីករាលដាលជាសាកលនេះ ។
លោក សាន វិជ្ជាសារ៉ាវុធ ក៏យកសេចក្តីណែនាំ របស់ក្រសួងពាណិជ្ជកម្ម និងអន្តរក្រសួង គឺតម្លៃប្រេងត្រូវកំណត់លក់ ០,២០ដុល្លារក្នុង១លីត្រ សម្រាប់ប្រេងសាំង ។ ត្រូវបានកំណត់០,២៣ដុល្លារក្នុង១លីត្រសម្រាប់ប្រេងម៉ាស៊ូត ។
តម្លៃនេះ ក៏ត្រូវសមស្របនឹងអត្រាប្តូរប្រាក់ ដែលចេញដោយធនាគារជាតិនៃកម្ពុជាផងដែរ៕ ដោយ ៖ បន្ទាយ