អាជ្ញាធរសុខាភិបាលចិន បានឲ្យដឹងនៅថ្ងៃព្រហស្បតិ៍នេះថា មានការឆ្លងវីរុសកូរ៉ូណាថ្មីចំនួន ៦៣ករណី ដែលក្នុងចំណោមនោះ មាន ៦១ករណី ជាការឆ្លងមកពីប្រភពខាងក្រៅប្រទេស។
មានការឆ្លងថ្មីក្នុងស្រុកចំនួន ២ករណី នៅក្នុងខេត្តក្វាងទុង។ នេះបើតាមការបញ្ជាក់ របស់គណៈកម្មការសុខាភិបាលជាតិ។
កាលពីថ្ងៃពុធម្សិលមិញ ក៏មានករណីស្លាប់ ២នាក់ នៅក្នុងខេត្តហូបេ។ មនុស្សចំនួន ៩១នាក់បានជាសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ ខណៈដែលករណីធ្ងន់ធ្ងរ បានធ្លាក់ចុះចំនួន ១៣ករណី មកសល់ត្រឹម ១៧៦ករណី។
ចាប់ពីថ្ងៃពុធមក អាជ្ញាធរចិនប្រកាសថា មានករណីឆ្លងមកពីប្រភពខាងក្រៅ សរុបទាំងអស់ចំនួន ១.១០៣ករណី ដែលក្នុងចំណោមនោះ មាន ៣៧៤នាក់ បានជាសះស្បើយ និងត្រូវបានអនុញ្ញាត ឲ្យចេញពីមន្ទីរពេទ្យ ខណៈអ្នកនៅសល់កំពុងត្រូវសម្រាកព្យាបាល។
សូមបញ្ជាក់ថា ចាប់តាំងពីផ្ទះវីរុសកូរ៉ូណា ឬ COVID-19 កាលពីខែធ្នូ ឆ្នាំមុនមក ចិនមានអ្នកឆ្លងសរុបចំនួន ៨១.៨៦៥នាក់។ មនុស្សចំនួន ៣.៣៣៥នាក់ស្លាប់ និង ៧៧.៣៧០នាក់ត្រូវបានព្យាបាលជាសះស្បើយ។
កាលពីថ្ងៃម្សិលមិញនេះ រដ្ឋាភិបាលចិនបានដកបម្រាមដើរហើរ នៅក្នុងទីក្រុងវូហាន និងអនុញ្ញាត ឲ្យប្រជាជនធ្វើដំណើរធម្មតាវិញ ក្រោយពេលបិទអស់រយៈពេល ១១សប្តាហ៍។
ការធ្វើដំណើរតាមរថភ្លើង និងតាមដងផ្លូវត្រូវបានបើកឲ្យដំណើរការវិញធម្មតា។
ការប្រកាសអនុញ្ញាតឲ្យប្រជាជនដើរហើរវិញនេះ កើតឡើងក្រោយពេលចិន ប្រកាសថាគ្មានអ្នកស្លាប់ ដោយសារវីរុសកូរ៉ូណាកាលពីថ្ងៃចន្ទ។ វាគឺជាលើកដំបូងហើយ ដែលមិនមានអ្នកស្លាប់ ចាប់តាំងពីចិន បានចាប់ផ្តើមប្រកាសតួលេខប្រចាំថ្ងៃមក៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua
