ជាវិស្វករយន្តហោះម្នាក់ដែលទទួលបានប្រាក់ខែសមរម្យ ដែលអាចផ្គត់ផ្គង់ជីវភាពគ្រួសារលើសពីគ្រប់គ្រាន់ បុរសម្នាក់នៅក្នុងប្រទេសថៃ ជាអកុសលត្រូវធ្វើការសម្រេចចិត្តយ៉ាងពិបាក ក្នុងការរកមធ្យោបាយសាងចំណូលផ្សេងពីនេះ បន្ទាប់ពីក្រុមហ៊ុនរបស់គាត់ បានបញ្ឈប់ការងារ និងសូម្បីប្រាក់ខែក៏គ្មាន។
លោក Folkky Chutiphong ដែលបានចែករំលែករឿងរ៉ាវរបស់គាត់ នៅលើហ្វេសប៊ុក និងធ្វើឲ្យរំជួលបេះដូងមនុស្សជាច្រើន បើទោះជាបានជួបបញ្ហាជីវិតពេលមានវិបត្តិនេះ យ៉ាងក៏ដោយ ក៏គាត់នៅតែមានសង្ឃឹមដែរ។
នៅពេលដែលគាត់នៅមានការងារនៅឡើយ លោក Chutiphong ទទួលបានប្រាក់ខែជិត ១០ ម៉ឺនបាតក្នុងមួយខែ (ស្មើ ៣.០០០ ដុល្លារ)។ ប៉ុន្តែដោយសារតែវិបត្តិសេដ្ឋកិច្ចនាពេលបច្ចុប្បន្ន ក្រុមហ៊ុនបានផ្ញើលិខិតមួយឲ្យគាត់ ដោយបញ្ជាក់ថា ការងាររបស់គាត់ត្រូវបានផ្អាក ជាបណ្តោះអាសន្នហើយ។ គាត់បានលើកឡើងថា ខណៈពេលដែលប្រាក់ចំណូលរបស់គាត់ បានផ្អាកដ៏ប្រថុចញ៉ុចបែបនេះ ការចំណាយរបស់គាត់នៅតែបន្តកើនឡើង ដែលបង្កើតឱ្យមានភាពតានតឹងមិនគួរឱ្យជឿ។
ប៉ុន្តែនៅពេលដែលគាត់ក្រឡេកមើលមុខកូនប្រុសរបស់គាត់ៗ បានរំលឹកខ្លួនឯងថា “ខ្ញុំមិនអាចមានអារម្មណ៍តានតឹង បែបនេះទេ។ ខ្ញុំត្រូវតែរកអ្វីដែលត្រូវធ្វើ ដើម្បីបានប្រាក់ផ្គត់ផ្គង់គ្រួសាររបស់ខ្ញុំ” ។
ដោយប្តេជ្ញាថានឹងស្វែងរកប្រភពចំណូលថ្មី បន្ទាប់មក លោក Chutiphong បានពិភាក្សាជាមួយមិត្តភក្តិ ហើយងាកទៅរកគំនិតនៃការបើកក្រុមហ៊ុនសេវាកម្ម សម្អាតម៉ាស៊ីនត្រជាក់។ ជាការពិតណាស់ សម្រាប់ខែរដូវក្តៅនេះ គឺពិតជាក្តៅណាស់នៅក្នុងប្រទេសថៃ ខណៈមនុស្សជាច្រើនឥឡូវនេះ ក៏កំពុងត្រូវស្នាក់នៅក្នុងផ្ទះទៀត ដែលជាឱកាសរកការងារធ្វើបាន។
ជាមួយមុខរបរបង្កើតអាជីវកម្មថ្មីរបស់ពួកគេ លោក Chutiphong និងមិត្តរបស់គាត់ បានសម្អាតម៉ាស៊ីនត្រជាក់ អស់រយៈពេលជាងមួយសប្តាហ៍មកហើយៗ អាចលាងសម្អាតម៉ាស៊ីនត្រជាក់ចំនួន ៦ គ្រឿងក្នុងមួយថ្ងៃ។ ពួកគេគិតថ្លៃ ៣៥០ បាត (៣ម៉ឺន៥ពាន់រៀល) ក្នុងការសម្អាតម៉ាស៊ីនត្រជាក់មួយគ្រឿង ។
ផ្អែកលើតម្លៃនេះ ពួកគេទាំងពីរនាក់មានចំណូលប្រចាំថ្ងៃប្រហែល ២១០០ បាត (ប្រមាណជា ) ហើយដោយធ្វើការ ៦ ថ្ងៃក្នុងមួយសប្តាហ៍ ពួកគេរកបានប្រាក់ចំណូលសរុបជាង ៥០.៤០០ បាតក្នុង១ខែ។ បន្ទាប់ពីការកាត់បន្ថយការចំណាយ ពួកគេចែករំលែកប្រាក់ចំណេញចុងក្រោយចំនួន ២០.០០០ បាត ។
ទោះបីវាមិនច្រើនដូចអ្វីដែលគាត់រកបានពីមុនក៏ដោយ ក៏លោក Chutiphong មានមោទនភាពដោយបាននិយាយថា គាត់នឹងបន្តធ្វើការងារនេះទៀត ដើម្បីផ្គត់ផ្គង់គ្រួសាររបស់គាត់ក្នុងគ្រាលំបាកនេះ៕
ប្រែសម្រួល៖ លឹម ហុង (ប្រភព៖ worldofbuzz)
