ភ្នំពេញ៖ អនុរដ្ឋលេខាធិការក្រសួងព័ត៌មាន និងជាអ្នកនាំពាក្យ បានបញ្ជាក់ប្រាប់ទៅគ្រប់ប្រព័ន្ធផ្សព្វផ្សាយព័ត៌មានថា ក្រសួង មិនដែលប្រកាសទទួលស្គាល់ថា ការផ្សព្វផ្សាយព័ត៌មាន នៅលើបណ្តាញទំនាក់ទំនងសង្គមហ្វេសប៊ុកថា មានលក្ខណៈត្រឹមត្រូវតាម ផ្លូវច្បាប់នោះទេ ហើយពួកគេត្រូវទទួលខុសត្រូវចំពោះមុខច្បាប់ជាធរមាន។
ឯកឧត្តម បានបន្តថា ក្រសួងផ្តល់ការទទួលស្គាល់ចំពោះតែការចុះបញ្ជីត្រឹមត្រូវផ្សព្វផ្សាយព័ត៌មាននៅលើគេហទំព័រប៉ុណ្ណោះ ។
ឯកឧត្តម មាស សោភ័ណ្ឌ អ្នកនាំពាក្យក្រសួងព័ត៌មាន បានបញ្ជាក់ដូច្នោះ ធ្វើឡើងក្នុងសន្និសីទសារព័ត៌មាន ស្តីពីវឌ្ឍនភាព និងទិសដៅការងារបន្ត របស់ក្រសួងព័ត៌មាន ដែលរៀបចំឡើងនៅព្រឹកថ្ងៃទី៩ មេសានេះ នាទីស្តីការគណៈរដ្ឋមន្ត្រី ។
ឯកឧត្តម មាស សោភ័ណ្ឌ បានថ្លែងថា សម្រាប់ការផ្សព្វផ្សាយព័ត៌មាន តាមបណ្តាញទំនាក់ទំនងសង្គមហ្វេសប៊ុក នាពេលកន្លងទៅនេះ គឺក្រសួងមិនដែលទទួលស្គាល់ឡើយ ។ ដោយឡែកចំពោះបញ្ហានេះ ក៏ក្រសួងមិនបានពង្រើយកន្តើយឡើយ ដោយក្រសួង បានមានវិធានការផ្លូវច្បាប់ ក្នុងការអប់រំណែនាំដល់អង្គភាព ឬស្ថាប័នព័ត៌មាននានា ណាដែលមិនបានចុះបញ្ជីត្រឹមត្រូវ ។
ឯកឧត្តម ព្រមានដែរថា ចំពោះអ្នកដែលប្រើបណ្តាញសង្គមហ្វេសប៊ុក ដែលកំពុងមានចេតនា នៅក្នុងការផ្សព្វផ្សាយព័ត៌មាន លើបណ្តាញទំនាក់ទំនងសង្គម គឺត្រូវទទួលខុសត្រូវចំពោះមុខច្បាប់ ៕ដោយ៖កូឡាប
