ភ្នំពេញ៖ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃនាយកដ្ឋានអន្តោប្រវេសន៍ បានអនុញ្ញាតឲ្យតំណាងស្ថានទូតហ្វីលីពីន លោក JOEL ROCES ចូលជួបសម្តែងការគួរសម និងពិភាក្សាការងារ នៅអគ្គនាយកដ្ឋានអន្តោប្រវេសន៍នៅរសៀលថ្ងៃពុធទី៨ ខែមេសា ឆ្នាំ២០២០ ។
ក្នុងជំនួបនោះ លោក JOEL ROCES បានស្នើសុំភាគីកម្ពុជា អនុញ្ញាតឲ្យជនជាតិហ្វីលីពីនចំនួន ៣នាក់ ដែលស្នាក់នៅលើសទិដ្ឋាការ (នារី ២នាក់ និងទារក ១នាក់) ចាកចេញពីកម្ពុជា ដោយមិនចាំបាច់ផាកពិន័យ ដើម្បីឲ្យពួកគេ បានចេញដំណើរ ជាមួយជនជាតិហ្វីលីពីន ១៨០នាក់ផ្សេងទៀត តាមជើងយន្តហោះពិសេស ដែលរដ្ឋាភិបាលហ្វីលីពីន គ្រោងនឹងបញ្ជូនមកនៅថ្ងៃទី១៥ ខែមេសា ឆ្នាំ២០២០ខាងមុខនេះ។
ឯកឧត្តម នាយឧត្តមសេនីយ៍ បានឯកភាពសម្រួលឲ្យជនជាតិហ្វីលីពីន ចាកចេញពីកម្ពុជា តែតម្រូវឲ្យភាគីហ្វីលីពីន ផ្ដល់ឯកសារពាក់ពន្ធ័របស់អ្នកទាំង ៣នាក់នោះ មកអគ្គនាយកដ្ឋាន (ឯកសារធ្វើដំណើរ និងសំប្រុតកំណើត) បន្ទាប់មកភាគីហ្វីលីពីន សន្យានឹងផ្តល់ឯកសារមក នៅថ្ងៃចន្ទក្រោយ៕ ដោយ ៖ បញ្ញាស័ក្តិ