ចិន នៅថ្ងៃសុក្រនេះ បានប្រកាសថា អ្នកឆ្លងវីរុស COVID-19 ថ្មីមានការធ្លាក់ចុះ ជាពិសេសករណីឆ្លងមកពីប្រភពខាងក្រៅ ដែលកាលពីពេលថ្មីៗនេះ អាជ្ញាធរមានការព្រួយរម្ភថា អាចនឹងមានការឆ្លងរាតត្បាតជាលើកទី ២ ខណៈដែលមានការដកបម្រាមដើរហើរនៅទីក្រុងវូហាន។
គណៈកម្មការសុខាភិបាលជាតិបាននិយាយថា មានការឆ្លងថ្មីចំនួន ៤២ករណី ដែលជាករណីឆ្លងមកពីប្រភពខាងក្រៅនៅថ្ងៃព្រហស្បតិ៍ តួលេខនេះមានការថយចុះ បើធៀបទៅនឹងការឆ្លង ៦៣ករណីកាលពីថ្ងៃពុធ។
រដ្ឋាភិបាលចិនបានធ្វើការរឹតបន្តឹងដ៏ខ្លាំង លើការធ្វើដំណើរចាប់តាំងពីខែមករាមក ហើយវិធានការនោះ បានជួយធ្វើឲ្យចំនួនអ្នកឆ្លងវីរុសកូរ៉ូណា ធ្លាក់ចុះខ្លាំង ប៉ុន្តែអ្នកបង្កើតគោលនយោបាយ មានការព្រួយបារម្ភ ពីការផ្ទុះឆ្លងជាលើកទី ២ ដោយសារតែប្រជាជនចិន ជាច្រើនបានវិលត្រឡប់ ចូលក្នុងប្រទេស ឬក៏តាមរយៈអ្នកជំងឺដែលឆ្លង ប៉ុន្តែគ្មានចេញរោគសញ្ញា។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះឡើងដំបូង នៅក្នុងទីក្រុងវូហាន កាលពីខែធ្នូ ឆ្នាំមុន និងបានរាតត្បាតឆ្លងទៅជុំវិញពិភពលោក។ បើតាមតួលេខនៅថ្ងៃសុក្រនេះ អ្នកឆ្លងសរុបទូទាំងពិភពលោក មានច្រើនជាង ១.៦លាននាក់ និងសម្លាប់មនុស្សជាង ៩៥.០០០នាក់។
អាមេរិច អ៊ីតាលី អេស្ប៉ាញ អ៊ីរ៉ង អាឡឺម៉ង និងបារាំង កំពុងមានការឆ្លងរាតត្បាតខ្លាំងជាងគេ ដោយមានអ្នកឆ្លងរាប់សែននាក់ និងស្លាប់រាប់ម៉ឺននាក់ ខណៈដែលចិន មានអ្នកឆ្លងសរុបជាង ៨២.០០០នាក់ និងស្លាប់ជាង ៣.៣០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
