ភ្នំពេញ ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ របស់ក្រសួងពាណិជ្ជកម្ម បានយកអាល់កុលក្លែងក្លាយ ដែលជាសារធាតុមេតាណុល ចំនួនជាង៦ម៉ឺនលីត្រ ទៅចាក់បង្ហូរចូលក្នុងលូទឹកស្អុយបឹងតាមោក ត្រង់ស្ថាននីយ៍បូមទឹក ទំនប់កប់ស្រូវ ស្ថិតក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ កាលពីម៉ោងប្រមាណ៩ព្រឹក ថ្ងៃទី១០ ខែមេសា ឆ្នាំ២០២០ ។
លោក ឌឹម ថេង អគ្គនាយករងនៃអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្ម នៃក្រសួងពាណិជ្ជកម្ម បានឱ្យដឹងថា អគ្គនាយកដ្ឋាន រួមទាំងសមត្ថកិច្ច អាជ្ញាធរ និងមន្ត្រីជំនាញ បានកម្ទេចអាល់កុលក្លែង ចំនួន ៦៤.៨៤៩លីត្រ ដែលត្រូវសមត្ថកិច្ចបង្ក្រាបកន្លងមក។ សមត្ថកិច្ច បានយកអាល់កុលក្លែងក្លាយដែលមានសារធាតុមេតាណុលចាក់ចូលទៅក្នុងទឹកស្អុយ ដោយខ្លាចប៉ះពាល់ដល់បរិស្ថានជាជំហានដំបូង គឺចាក់ចូលប្រមាណ២០ទៅ៣០តោនសិន។
អាល់កុលក្លែងក្លាយ ប្រភេមេតាណុលនេះជាសារធាតុពុល មិនអាចយកមកប្រើប្រាស់ក្នុងការកម្ចាត់មេរោគនោះទេ អាចបណ្តាលឱ្យមានគ្រោះថ្នាក់ធ្ងន់ធ្ង ដល់សុខភាព។ ហើយផលប៉ះពាល់មេតាណុលនេះ ទៅលើសុខភាពតាមរយៈការស្របចូល ឬជ្រាបក្នុងស្បែកអាចពុលដល់ប្រព័ន្ធរាង្គកាយ និងខូចដល់ប្រព័ន្ធខួរក្បាល ។ បើសិនជាមានការដាក់លាយក្នុងស្រា ឬភេសជ្ជៈផ្សេងៗ អាចគ្រោះថ្នាក់ដល់បាត់បង់ជីវិត៕ដោយ៖បញ្ញាស័ក្តិ