ត្បូងឃ្មុំ៖ មានម្ចាស់គណនីឈ្មោះ អធិរាជ ហ្វេសបុក យោ ចាន់ធូ ដែលបានចុះផ្សាយមានខ្លឹមសារថា ចុមប៉ូលិសស្រុកខ្ញុំឥឡូវសាហាវដល់ថ្នាក់នឹងផង ប៉ូលិសខឹងឲ្យលុយតែ៦ម៉ឺនរៀល បើកឡានដេញបាញ់គំរាម១គ្រាប់ រួចកៀរឲ្យក្រឡាប់ស្លាប់៣នាក់។ ប៉ុន្តែករណីនេះស្នងការដ្ឋាននគរបាលខេត្តត្បូងឃ្មុំ បញ្ជាក់ថា ករណីខាងលើកើតឡើងតាំងពីថ្ងៃទី៣០ ខែមីនា ឆ្នាំ២០១៨ វេលាម៉ោង៦:១៥នាទី លើចំណុចផ្លូវជាតិលេខ៨ នៅចំណុចភូមិអូរព្រិច ឃុំកក់ ស្រុកពញាក្រែក ខេត្តត្បូងឃ្មុំ មានគ្រោះថ្នាក់ចរាចរណ៍ ១កើតឡើង រវាងរថយន្ត៣គ្រឿង គឺរថយន្តម៉ាកសាំយ៉ុង ពណ៌ស និងរថយន្តទីតាន់ និងរថយន្តសាំយ៉ុង ពណ៌លឿន ហើយក៏មិនពាក់ព័ន្ធជាមួយមន្ត្រីនគរបាលដែរ។
ស្នងការដ្ឋាននគរបាលខេត្តត្បូងឃ្មុំ កាលពីថ្ងៃទី១០ខែមេសាឆ្នាំ២០២០ បានឲ្យដឹងថា ស្នងការដ្ឋាននគរបាលខេត្តត្បូងឃ្មុំ សូមគោរពជម្រាបជូនសាធារណៈជនមេត្តាជ្រាបថា៖ ក្រោយពីទទួលបានព័ត៌មានចុះផ្សាយតាមបណ្តាញសង្គមFacebook ដ៏ដែលៗជាច្រើនលើក ច្រើនសារ របស់ម្ចាស់គណនីឈ្មោះ អធិរាជ ហ្វេសបុក យោ ចាន់ធូ ដែលបានចុះផ្សាយមានខ្លឹមសារថាៈ(#ចុមប៉ូលិសស្រុកខ្ញុំឥឡូវសាហាវដល់ថ្នាក់នឹងផង ប៉ូលីសខឹងឲ្យលុយតែ៦ម៉ឺនរៀល បើកឡានដេញបាញ់គំរាម១គ្រាប់ រួចកៀរឲ្យក្រឡាប់ស្លាប់៣នាក់)។
សូមបញ្ជាក់ថាៈកាលពីថ្ងៃទី៣០ ខែមីនា ឆ្នាំ២០១៨ វេលាម៉ោង៦:១៥នាទី លើចំណុចផ្លូវជាតិលេខ៨ នៅចំណុចភូមិអូរព្រិច ឃុំកក់ ស្រុកពញាក្រែក ខេត្តត្បូងឃ្មុំ មានគ្រោះថ្នាក់ចរាចរណ៍ ១កើតឡើង រវាង រថយន្តម៉ាកសាំយ៉ុង ពណ៌ស និងរថយន្តទីតាន់ និងរថយន្តសាំយ៉ុង ពណ៌លឿន (រថយន្ត៣គ្រឿង) មូលហេតុដោយ រថយន្តម៉ាកសាំយ៉ុង ពណ៌ស បើកបរក្នុងល្បឿនលឿន ពី(ជើង-ត្បូង) ខណៈមកដល់ចំណុចកើតហេតុជាផ្លូវកោងខ្លាំងក៏ជ្រុលទៅបុករថយន្តម៉ាកទីតាន់ពីក្រោយដែលកុំពុងបើកបរស្របទិសគ្នា ភ្លាមនោះរថយន្តម៉ាកទីតាន់បានរ៉េចង្កូតទៅបុករថយន្តម៉ាកសាំយ៉ុង ពណ៌លឿង១គ្រឿងទៀត ដែលកុំពុងបើកបរបញ្ច្រាសទិសគ្នាពី(ត្បូង-ជើង) បណ្តាលឲ្យរថយន្តទាំង៣គ្រឿងធ្លាក់ទៅខាងកើតផ្លូវតែម្តង។ សមត្ថកិច្ចនគរបាលជំនាញបានធ្វើការស្រាវជ្រាវកសាងសំណុំរឿងចាត់ការតាមនីតិវិធីរួចហើយ។
ស្នងការដ្ឋាននគរបាលខេត្ត សូមបញ្ជាក់ថាៈព័ត៌មានខាងលើនេះគឺមិនពាក់ព័ន្ធជាមួយមន្ត្រីនគរបាលនោះទេ ដូចដែលបានបង្ហោះផ្សព្វផ្សាយចោទប្រកាន់មកលើសមត្ថកិច្ចនគរបាល ៕ ដោយ ៖ បញ្ញាស័ក្តិ
