ភ្នំពេញ ៖ ក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីណែនាំ ស្តីពីវិធានការបន្ទាន់ ដើម្បីដោះស្រាយបញ្ហានៃការធ្លាក់ចុះថ្លៃផលិតផលផ្លែស្វាយ ខណៈពេលដែលសិប្បកម្មកែច្នៃដំណាប់ស្វាយដែលនៅដំណើរការ បាននិងកំពុងប្រមូលទិញផ្លៃស្វាយស្រស់ សម្រាប់ធ្វើការកែច្នៃត្រឹមតែ២០ទៅ៣០តោនក្នុងមួយថ្ងៃ ដោយក្នុងតម្លៃតែ៣២០រៀលក្នុងមួយគីឡូក្រាម។
បើយោងតាមសេចក្តីជូនដំណឹង នៅថ្ងៃទី១០ ខែមេសា ឆ្នាំ២០២០នេះ ក្រសួងកសិកម្ម បានលើកឡើងថា ស្ថិតក្នុងកាលៈទេសៈ ដែលកម្ពុជា បាននិងកំពុងប្រយុទ្ធប្រឆាំង នឹងការឆ្លងរាលដាលនៃជំងឺកូវី១៩ ដែលជំងឺនេះ មិនត្រឹមតែបានបង្កឲ្យមានផលប៉ះពាល់ដល់សុខភាពសាធារណៈប៉ុណ្ណោះទេ ប៉ុន្តែបានធ្វើឲ្យមានផលប៉ះពាល់ដោយផ្ទាល់ ឬប្រយោលចំពោះសេដ្ឋកិច្ចជាតិ ជាពិសេសការប្រែប្រួលនៃតម្លៃទីផ្សារផលិតផលកសិកម្ម។ ទន្ទឹមនឹងនេះ តម្លៃនៃផលិតផលផ្លែស្វាយក៏មានការធ្លាក់ចុះគួរឲ្យគត់សម្គាល់ដោយសារកត្តាសំខាន់មួយចំនួន ។
ឯកឧត្តម វេង សាខុន រដ្ឋមន្ត្រីក្រសួងកសិកម្ម បានថ្លែងថា ក្នុងអំឡុងពេលឆ្លងរាលដាលជំងឺកូវីដ១៩នេះ រោងចក្រ និងសិប្បកម្មកែច្នៃដំណាប់ស្វាយមួយចំនួន បានផ្អាកដំណើរការជាបណ្តោះអាសន្ន ដោយសារការបញ្ជាទិញផលិតផលដែលកែច្នៃរួចនាំចេញបានតិចតួច និងខ្វះកម្មករហើយរោងចក្រ និងសិប្បកម្មកែច្នៃដំណាប់ស្វាយដែលនៅដំណើរការ បាននិងកំពុងប្រមូលទិញផ្លៃស្វាយស្រស់ សម្រាប់ធ្វើការកែច្នៃត្រឹមតែ២០ទៅ៣០តោនក្នុងមួយថ្ងៃ ដោយក្នុងតម្លៃតែ៣២០រៀលក្នុងមួយគីឡូក្រាមតែប៉ុណ្ណោះ បើប្រៀបធៀបនឹងរយៈពេលដូចគ្នាឆ្នាំ២០១៩ ការប្រមូលទិញផ្លែស្វាយស្រស់មានតម្លៃរហូតដល់៨០០រៀលក្នុងមួយគីឡូក្រាម។
នៅចំពោះមុខ ដើម្បីដោះស្រាយបញ្ហាខាងលើនេះ ឯកឧត្តមរដ្ឋមន្ត្រី ដាក់ផែនការឲ្យមន្ទីរកសិកម្ម រាជធានី ខេត្ត ត្រូវសហការជាមួយ នាយកដ្ឋានកសិឧស្សាហកម្ម ដើម្បីជំរុញឲ្យកសិកម្មឲ្យចងក្រងជាក្រុមផលិត និងសហគមន៍ ដោយត្រូវចុះបញ្ជីឲ្យបានត្រឹមត្រូវ ដើម្បីងាយស្រួលរៀបចំផែនការផលិតកម្មស្វាយជាលក្ខណៈប្រមូលផ្តុំ បណ្តុះបណ្តាលបច្ចេកទេស ស្របតាមស្តង់ដារ និងការផ្សារភ្ជាប់ទីផ្សារ តាមរយៈការចុះកិច្ចសន្យាទិញ លក់។ ត្រូវជំរុញផ្សព្វផ្សាយការប្រើប្រាស់បណ្តាញព័ត៌មានទីផ្សារផលិតផលកសិកម្ម តាមបច្ចេកទេសទំនើប ដល់កសិករ រួមទាំងការដាំដុះ បច្ចេកទេសក្រោយប្រមូលផល និងការស្តុកទុករយៈពេលវែង៕ ដោយ៖កូឡាប