ស្ទឹងត្រែង: ប្រជាពលរដ្ឋជាច្រើនរយគ្រួសារ នៅក្នុងឃុំចម្ការលើ ស្រុកថាឡាបរិវ៉ាត់ ខេត្តស្ទឹងត្រែង បានប្រើប្រាស់ទឹកកខ្វក់ដោយសារតែរដូវប្រាំង ទឹកប្រឡាយអូររីងស្ងួត ហើយអ្នកភូមិត្រូវបង្ខំចិត្ត ទិញទឹកតពីអ្នកដឹកទឹកលក់ចល័ត តាមរថយន្ត។
អ្នកភូមិចម្ការលើ បានរៀបរាប់ថា រាល់ឆ្នាំរដូវប្រាំងអូរថ្មបាំង ក្នុងឃុំចម្ការលើ ទឹកប្រឡាយ អូរត្រូវរីងស្ងួត។ ហើយអ្នកភូមិជាច្រើនរយគ្រួសារ បានប្រើប្រាស់ទឹកអូរមួយនេះ ជាប្រចាំ ដោយខ្លះជីកអណ្តូងដៃ មានជម្រៅចាប់ពីកន្លះម៉ែត្រក្នុងអូរ។ ឃុំនេះមានទឹកអណ្តូងស្នប់ សម្រាប់ប្រើប្រាស់ដែរ តែមិនគ្រប់គ្រាន់ ទើបប្រជាពលរដ្ឋសម្រេចចិត្ត ប្រើទឹកអណ្តូងជីកដោយដៃតាមដងអូរ។ ពលរដ្ឋខ្លះក៏ទិញទឹកពីអ្នកដឹកលក់ តាមរថយន្តបន្ថែម។
អ្នកភូមិរិះគន់ថា ទឹកដែលគេបូមពីអូរថ្មបាំង ដើរលក់ គឺជាទឹកកខ្វក់អាចនឹងប៉ះពាល់ ដល់សុខភាពអ្នកប្រើប្រាស់។ អ្នកដឹកទឹកលក់ គិតតែប្រយោជន៍ផ្ទាល់ខ្លួន ពុំបានគិតដល់ប៉ះពាល់សុខភាព អ្នកប្រើឡើយ។
លោក វង្ស ឡែន មេភូមិចម្ការលើ បាននិយាយថា លោកពិតជាទទួលស្គាល់ ឃើញទឹកអូររីងស្ងួត ដក់ទឹកដោយកន្លែង ហើយមិនស្អាត។ គាត់ ក៏គ្មានវិធានការទៅលើបុគ្គលឈ្មោះហេង អ្នកដឹកទឹកលក់តាមភូមិនោះដែរ។
លោក ហេង អ្នកដឹកទឹកលក់ មិនទាន់សុំការពន្យល់ ក្នុងករណីលើកឡើង ដែលអ្នកភូមិចោទថា បូមទឹកលក់មិនស្អាតនៅឡើយទេ៕ ដោយ:សុខុម
