ខេត្តកណ្តាល៖ កាលពីវេលាម៉ោង៨ និង ៣០ នាទីយប់ ថ្ងៃទី១០ ខែមេសា ឆ្នាំ២០២០ ពលរដ្ឋជាច្រើនបានសម្រុកចេញពីទីក្រុងភ្នំពេញ ដើម្បីឆ្ពោះទៅកាន់ខេត្តព្រៃវែង និងខេត្តស្វាយរៀង ដែលបានធ្វើឲ្យមានការកកស្ទះនៅគល់ស្ពានអ្នកលឿងត្រើយខាងលិច បីទោះជារដ្ឋាភិបាលបានចេញបទបញ្ជាឲ្យអាជ្ញាធរ និងសមត្ថកិច្ចគ្រប់ជាន់ថ្នាក់បិទការធ្វើដំណើរក្នុងប្រទេស ពិសេសការចាកចេញពីទីក្រុងភ្នំពេញទៅតាមបណ្តាខេត្តផ្សេង ដើម្បីទៅជួបជុំក្រុមគ្រួសារនៅក្នុងពិធីបុណ្យចូលឆ្នាំខាងមុខនេះ ព្រោះថា អាចបង្កឲ្យជំងឺកូវីដ១៩នេះ កាន់តែរីកធំ។
ជាមួយនឹងទង្វើប្រាប់មិនស្តាប់នេះដ៏ហួសចិត្តនេះ មហាជនបានលើកឡើងថា ដូចអត់ដែលស្គាល់ចូលឆ្នាំ មួយឆ្នាំៗចូលបីដង ឆ្នាំហ្នឹងពីររួចហើយនៅហេវទៀត។ គ្មានដឹងថ្នាក់ដឹកនាំលោកពិបាកប៉ុណ្ណា ។
អ្នកខ្លះទៀតក៏ដាក់ឲ្យបែបនេះថា ដល់តែអ៊ីចឹងទៅ លែងយល់ហ្មង! បើគ្មានចូលឆ្នាំ ឆ្នាំនេះ យើងមានឆ្នាំក្រោយច្រើនដងទៀត តែបើងាប់ឆ្នាំនេះ អត់មានកើតឆ្នាំក្រោយទេ! ទ្រាំបន្តិចទៅបងប្អូន! ៕ ដោយ៖ លឹម ហុង
