ចំនួនអ្នកឆ្លងវីរុសកូរ៉ូណានៅអាមេរិច បានកើនលើស ៥០០.០០០នាក់នៅថ្ងៃសុក្រនេះ (ថ្ងៃសៅរ៍នៅខ្មែរ) បើទោះបីជាមានសញ្ញាបង្ហាញថា ការស្នាក់នៅផ្ទះរបស់ប្រជាពលរដ្ឋអាមេរិច កំពុងតែជួយទប់ស្កាត់ការឆ្លងថ្មីក៏ដោយ។
ចំនួនអ្នកឆ្លងវីរុសកូរ៉ូណាថ្មី បានកើនឡើងពី ៣០.០០០ ទៅ ៣៥.០០០នាក់ក្នុងមួយថ្ងៃ ខណៈដែលមានការធ្វើតេស្តកាន់តែច្រើន។
ចំណែកចំនួនអ្នកស្លាប់ បានហក់ឡើងមកដល់ ១៨.៦០០នាក់ ខណៈដែលមន្ត្រីអាមេរិច បានធ្វើការព្រមានថា ចំនួនអ្នកស្លាប់ទំនង ជានឹងហក់ឡើងខ្ពស់ខ្លាំងនៅក្នុងសប្តាហ៍នេះ បន្ទាប់មកនឹងធ្លាក់ចុះវិញ ដោយសារតែមានភស្ថុតាងបង្ហាញថា ចំនួនអ្នកឆ្លងថ្មីធ្លាក់ចុះនៅ New York។
អាមេរិចកំពុងកាន់កាប់តំណែងលេខមួយ ជាប្រទេសដែលមានអ្នកឆ្លងច្រើនបំផុត និងតំណែងលេខ ២ជាប្រទេសមានអ្នកស្លាប់ច្រើនបំផុតបន្ទាប់ពីអ៊ីតាលី។
សូមបញ្ជាក់ថា វីរុសកូរ៉ូណា ឬ COVID-19 បានឆក់យកជីវិតមនុស្សជាង ១០២.០០០នាក់ និងបានឆ្លងទៅកាន់មនុស្សចំនួន ជិត ១.៧០០.០០០នាក់ទូទាំងពិភពលោក។ វីរុសដ៏កាចសាហាវនេះបានផ្ទុះឡើងដំបូងកាលពីចុងឆ្នាំ ២០១៩ ក្នុងប្រទេសចិន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia