ភ្នំពេញ៖ ឯកឧត្តម ហេង រតនា អគ្គនាយកស៊ីម៉ាក់ បានសរសេរសារនៅលើហ្វេសប៊ុក នៅថ្ងៃទី១១ខែមេសាឆ្នាំ២០២០ ថា នៅលើលោកយើងគិតមកដល់ពេលនេះ ជំងឺកូវីដ១៩ បានសម្លាប់មនុស្សជាង១០ម៉ឺននាក់ ឆ្លងជាង១លាន៦សែននាក់ហើយគឺឆ្លងមេរោគកូវីដ១៩លឿនណាស់។
ឯកឧត្តម ហេង រតនាបានថ្លែងថា ហើយបញ្ហាកំពុងតែវាយលុក យ៉ាងធ្ងន់ធ្ងរបំផុត នៅសហរដ្ឋអាមេរិក និងអឺរ៉ុប ដែលមានសេដ្ឋកិច្ច និងវិស័យសុខាភិបាលខ្លាំង។ គ្រប់ប្រទេស និងអ្នកជំនាញទាំងអស់ នៃប្រទេសរងគ្រោះលើលោកនេះ វាយតម្លៃថា វិធានការបង្ការដោយរក្សាចម្ងាយសុវត្ថិភាព បិទការជួបជុំមនុស្សច្រើន និងការស្នាក់ក្នុងផ្ទះមួយរយៈពេលប៉ុណ្ណោះ ដែលមានប្រសិទ្ធភាពខ្ពស់ ក្នុងការទប់ទល់នឹងជំងឺកូវីដ១៩ ដ៏មហាកាចសាហាវមួយនេះ។
ឯកឧត្តម បានស្នើសូមម្ចាស់ការអនុវត្តឱ្យបានដាច់ខាត តាមការណែនាំរបស់រាជរដ្ឋាភិបាល ដើម្បីសុខភាពនិងផលប្រយោជន៍ខ្លួនអ្នក គ្រួសារអ្នក ភូមិឃុំនាក់ និងសង្គមជាតិរួមរបស់យើង។ “មិនបានជួបជុំគ្នាផ្ទាល់មួយគ្រាខ្លី ដើម្បីរួមរស់ជួបជុំសប្បាយរីករាយរួមគ្នាអនាគតវែងឆ្ងាយ”! ខ្ញុំមានជំនឿថា រដ្ឋណាក៏ដូចរដ្ឋណាដែរ ប្រសិនបើជាវិធានការលើកទឹក និងសំណូមពរឱ្យចូលរួមដោយស្មារតីឆន្ទៈ ចូលរួមនិងលះបង់ទៅមិនរួចហើយ គឺមានតែវិធានការច្បាប់ និងវិធានការដាក់ប្រទេសក្នុងគ្រាអាសន្ន ដើម្បីចាប់បង្ខំតែម្តង ដូចជាករណីដាក់ប្រទេសក្នុងគ្រាអាសន្ន នៅប្រទេសថៃ ជប៉ុន ម៉ាឡេស៊ី អ៊ីតាលី អេស្បាញជាដើម។ ល៕ដោយ៖កូឡាប