បន្ទាយមានជ័យ ៖ ក្នុងអំឡុងដែលគ្រប់គ្នាក្នុងពិភពលោក និងនៅប្រទេសកម្ពុជា យើងព្រួយបារម្ភ ហើយប្រយុទ្ធប្រឆាំងនឹងជំងឺកូវីដ១៩ នេះ គ្រួសារកម្មករក្រីក្រមួយបង្កើតកូនដំបូងបានភ្លោះស្រី៣នាក់ ។
លោកស្រិល អូន ចៅសង្កាត់ផ្សារកណ្តាលប្រាប់ថ្ងៃទី១១ ខែមេសា ឆ្នាំ២០២០ ថា៖ ម្តាយមានឈ្មោះជួប ចិត្ត អាយុ៣២ឆ្នាំ និងបុរសជាឳពុកមានឈ្មោះខន យ៉ាន អយុ៣៥ឆ្នាំ មុខរបរ ជាកម្មកសំណង់ ក្នុងស្រុកទាំង២នាក់ ហើយមានគ្រែមួយរស់នៅជាមួយម្តាយនៃក្រុមគ្រួសារ មានជីវភាពទីទ័លក្រ នៅដីឡូត៍លេខ៨ មណ្ឌល៨ភូមិប្រជាធម្មកើត សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
ស្ត្រីបានសម្រាលលើកដំបូង បានកូនភ្លោះសុទ្ធតែស្រីចំនួន៣នាក់ តាំងពីថ្ងៃទី២៨ ខែមីនា ឆ្នាំ២០២០ នៅមន្ទីរពេទ្យគន្ធរបុប្ផាខេត្តសៀមរាប ។ ទារិកាកើតមកមានទម្ងន់ប្រហែល១គីឡូក្រាម ហើយត្រូវចិញ្ចឹមក្នុងកែវពីពេលសម្រាល ។
លុះដល់ចេញពីមន្ទីរពេទ្យ កាលពីថ្ងៃទី៩ ខែមេសា ឆ្នាំ២០២០ ទើបយកមកឲ្យដេកលើកម្រាលខ្នល់ខ្នើយ និងបំបៅដោយទឹកដោះម្តាយ ។
អ្នកស្រី ជួប ចិត្តបានឲ្យដឹងថា សុខភាពអ្នកស្រី និងទារកល្អធម្មតាដែរ ប៉ុន្តែដោយខ្វះខាតជីវភាពពេក ហើយកូនដល់ទៅ៣នាក់ផង ក៏ព្រួយបារម្ភមិនអាចមានម្ហូបអាហារហូបចុកគ្រប់គ្រាន់ ដើម្បីមានទឹកដោះឲ្យកូនបៅ ។
ចំណែកលោកខន យ៉ាន បានឲ្យដឹងថា គ្រួសារខ្លួនបានសម្រេចដាក់ឈ្មោះកូនស្រីទាំង៣ តាមលំដាប់បងម៉ោងគ្នាមកប្អូនមាន ៖ ១ឈ្មោះ ខន គឹមឡាង ឈ្មោះខន គឹមឡា និងឈ្មោះខន គឹមឡៃ ។
ចំពោះមុខសុខទុក្ខ និងជីវភាពនៃគ្រួសារពលរដ្ឋនេះ លោកស្រិល អូន ចៅសង្កាត់ លោកគាត ហ៊ុល អភិបាលក្រុងប៉ោយប៉ែត និងមន្ត្រីក្រុមការងារ សប្បុសរជនមូលដ្ឋាន បានទៅសួរសុខទុក្ខ និងផ្តល់ការឧបត្ថម្ភបឋម ដល់គ្រួសារនេះហើយ កាលពីថ្ងៃទី១០ ខែមេសា ឆ្នាំ២០២០ ។
លោក គាត ហ៊ុល និងក្រុមការងារ បានអបអរចំពោះសមាជិកពលរដ្ឋខ្លួន ហើយរីករាយដែលទារិកាទាំង៣ បានសុខសប្បាយ មានសុខភាពល្អ ។
លោកអភិបាលក្រុងប៉ោយប៉ែត លោកអភិបាលរង លោកស្រិល អ៊ិន ចៅសង្កាត់ផ្សារកណ្តាល ក្រុមការងារភូមិ អញ្ជើញចុះសួរសុខទុក្ខ នាំយកសម្ភារ និងថវិកា រួមជាមួយនឹងនាំយកលិខិតអត្រានុកូលដ្ឋានសំបុត្រកំណើតកូនទាំង ៣ ប្រគល់ជូន ដល់ពលរដ្ឋ១គ្រួសារនេះ ។
លោកបាននាំនូវប្រសាសន៍ផ្តាំផ្ញើ សួរសុខទុក្ខ និងក្តីនឹករលឹក ពីសំណាក់ថ្នាក់ដឹកនាំ ដែលជានិច្ចកាល តែតែងគិតគូរពីសុខទុក្ខ របស់បងប្អូនប្រជាពលរដ្ឋងាយរងគ្រោះ និងរងគ្រោះ ដោយសារគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ពូជសាសន៍ ពណ៌សម្បុរ ឬនិន្នាការនយោបាយអ្វីឡើយ៕ ដោយ ៖ បន្ទាយ