បើទោះមានវាសនាអភ័ព្វកើតមកជាមនុស្សគតាំងពីកំណើតមកក្តី តែប្អូនប្រុសម្នាក់នេះ បានខិតខំតស៊ូជម្នះ នឹងជីវិតដ៏លំបាកមួយនេះ អស់រយៈពេលជាច្រើនឆ្នាំ ដោយមិនជ្រើសរើសវិធីពឹងលើការ សុំជំនួយពីសប្បុរសជននោះទេ ។ ប៉ុន្តែ ផ្ទុយទៅវិញ ប្អូនប្រុសបានបង្កើតមុខរបរដោយខ្លួនឯង តាមរយៈធ្វើជាលក់ផលិតផលកែសម្ផស្សតាមអនឡាញមានដូចជា៖ ម្សៅ ឡេការពារកម្តៅថ្ងៃ ឡេធ្វើឲ្យស្បែកស និងគ្រឿងសម្អាងមួយចំនួនទៀតផងដែរ ។
ជាការពិតណាស់ មានមនុស្សជាច្រើនត្រូវបានគេមើលឃើញថា បាននិងកំពុងជោគជ័យ ជាមួយរបរលក់តាមអនឡាញនេះ ប៉ុន្តែ សម្រាប់ប្អូនប្រុសម្នាក់នេះដែលមានឈ្មោះថា Nut Nuttakit ហាក់ពិបាកនឹងភាពជោគជ័យនេះណាស់ ព្រោះថា រាល់ពេលឡាយវីដេអូ ប្អូនប្រើកាយវិការជំនួសការនិយាយ ដែលធ្វើឲ្យអតិថិជនពិបាកក្នុងយល់ និងណាមួយទៀត រូបគេក៏មិនអាចឆ្លើយឆ្លងនឹងសំណួររបស់អតិថិជន ដែលហេតុនេះ ពួកគេក៏បានអូសរំលង ។
ហេតុនេះ កាលពីថ្ងៃទី១០ ខែមេសា ឆ្នាំ២០២០ ប្អូនប្រុសខាងលើនេះ បានធ្វើឲ្យមហាជនជាច្រើនមានការរំជួលចិត្ដជាខ្លាំង ព្រោះតែសំណេរប៉ុន្មានឃ្លារបស់ប្អូន តាមរយៈគណនីហ្វេសប៊ុករបស់ខ្លួនឈ្មោះ Nut Nuttakit ដែលបានសរសេររៀបរាប់យ៉ាងដូច្នេះថា៖ “ជម្រាបសួរបងៗៗ ខ្ញុំចង់និយាយរឿងមួយ ខ្ញុំជាមនុស្សគ ខ្ញុំមិនបានថាអ្នកណាខ្លះអាក្រក់ទេ កើតអីអ្នកខ្លះថាខ្ញុំគ អាក្រក់មែនអត់ មានអ្នកណាស្អប់ខ្ញុំជាមនុស្សគមែនអត់? ខ្ញុំចង់លក់ឡេដើម្បីខ្លួនឯង ខ្ញុំជាកូនអ្នកក្រមែន អ្នកណាខ្លះស្អប់ខ្ញុំកូនក្រមែនអត់ ខ្ញុំមិនអីទេ ខ្ញុំជាមនុស្សគ ខ្ញុំនិយាយអត់កើតទេ ខ្ញុំមានលក់ម្ស៉ៅលាបមុខបាត់មុនឲ្យស្អាត ពេលព្រឹក ពេលយប់ ខ្ញុំមានលក់ឡេលាបខ្លួន ឲ្យសស្អាត” ។
យ៉ាងណាមិញ តាមរយៈអក្សរសរសេរនៅលើក្រដាសមួយសន្លឹកលើកបង្ហាញក្នុងអំឡុងពេលលក់ ប្អូនប្រុសបានប្រាប់ឲ្យដឹងថា៖ “ខ្ញុំគ មិនអាចនិយាយបានទេ! សួស្ដីបងៗទាំងអស់គ្នា! ដោយសារតែកូវីដ១៩ អ៊ុតសក់ក៏មិនដាច់ដែរ មានតែឡាយលក់ឡេទេ សូមបងៗជួយគាំទ្រទិញខ្ញុំផង សូមអរគុណ” ៕ ដោយ៖ លឹម ហុង
